ନୂଆଦିଲ୍ଲୀ:ଦିଲ୍ଲୀ ସମେତ ଉତ୍ତର ଭାରତ ଅଞ୍ଚଳରେ ଶକ୍ତିଶାଳୀ ଭୂକମ୍ପର ଝଟକା ଅନୁଭୂତ ହୋଇଛି । କିଛି ସମୟ ମଧ୍ୟରେ ଦୁଇଟି କମ୍ପନ ଅନୁଭୂତ ହୋଇଛି । ମାତ୍ର ଦୁଇ ମିନିଟ ବ୍ୟବଧାନରେ ଦୁଇଥର କମ୍ପନ ଅନୁଭବ ହୋଇଛି । ରିକ୍ଟର ସ୍କେଲରେ ପ୍ରଥମ କମ୍ପନର ତୀବ୍ରତା 4.6 ମ୍ୟାଗ୍ନିଚ୍ୟୁଡ୍ ଓ ପରବର୍ତ୍ତୀ କମ୍ପନ 6.2 ମ୍ୟାଗ୍ନିଚ୍ୟୁଡ ରହିଥିଲା । ଉଭୟ କମ୍ପନର କେନ୍ଦ୍ରସ୍ଥଳ ନେପାଳ ବୋଲି ଜଣାପଡ଼ିଛି । କୌଣସି କ୍ଷୟକ୍ଷତିର ସୂଚନା ମିଳିନି । କିନ୍ତୁ କମ୍ପନ ଅନୁଭୂତ ହେବା ପରେ ଦିଲ୍ଲୀର ଏକାଧିକ ଅଞ୍ଚଳରେ ଲୋକେ ଆପାର୍ଟମେଣ୍ଟରୁ ବାହାରକୁ ଚାଲିଆସିଥିଲେ । ରାଜଧାନୀ ଦିଲ୍ଲୀ, ଏନସିଆର ସମେତ ଉତ୍ତର ପ୍ରଦେଶ, ଉତ୍ତରାଖଣ୍ଡ, ଉତ୍ତର-ବିହାର, ପଞ୍ଜାବ, କାଶ୍ମୀର, ହିମାଚଳ ପ୍ରଦେଶର କିଛି ସ୍ଥାନରେ ଏହି ଭୂକମ୍ପ ଅନୁଭୂତ ହୋଇଛି ।
ସୂଚନା ଅନୁସାରେ, ପ୍ରଥମ କମ୍ପନଟି ୨.୫୧ ମିନିଟରେ ଅନୁଭୂତ ହୋଇଥିଲା । ଏହାପରେ ୨.୫୩ ମିନିଟରେ ଦ୍ବିତୀୟ କମ୍ପନ ଅନୁଭୂତ ହୋଇଥିଲା । ଜାତୀୟ ଭୂକମ୍ପ କେନ୍ଦ୍ର (National Centre for Seismology)ର ସୂଚନା ଅନୁସାରେ, ପ୍ରଥମ କମ୍ପନ ଅନୁଭୂତ ହେବା ପରେ ଏହାର ପରବର୍ତ୍ତୀ କମ୍ପନ (ଆଫ୍ଟର ସକ) ଭାବେ ଦ୍ବିତୀୟ କମ୍ପନ ଅନୁଭୂତ ହୋଇଥିଲା । ନେପାଳର ସୃଷ୍ଟ ଭୂକମ୍ପର ଏହାର କେନ୍ଦ୍ରସ୍ଥଳୀ ପ୍ରାୟ ଭୂପୃଷ୍ଠରୁ ୫ କି.ମି ଗଭୀରରେ ହୋଇଥିବା ନେଇ ପ୍ରଥାମିକ ଭାବେ କୁହାଯାଉଛି । ରାଜଧାନୀ ଦିଲ୍ଲୀ, ଏନସିଆର, ଲକ୍ଷ୍ନୌ, ହାପୁର ଓ ଅମରୋହାରେ ଏହାର ସର୍ବାଧିକ କମ୍ପନ ଅନୁଭୂତ ହୋଇଛି । ମାତ୍ର କୌଣସି ବିଲ୍ଡିଂ କ୍ଷତିଗ୍ରସ୍ତ ହେବା କିମ୍ବା କେହି ମୃତାହତ ହେବାର କୌଣସି ସୂଚନା ବର୍ତ୍ତମାନ ସୁଦ୍ଧା ହସ୍ତଗତ ହୋଇନାହିଁ । କୌଣସି ଆଲର୍ଟ ସୂଚନା ଜାରି କରାଯାଇନାହିଁ । ଏହାର ପରବର୍ତ୍ତୀ ପ୍ରତିକ୍ରିୟା ବା(ଆଫ୍ଟର ସକ୍) କିଛି ଘଣ୍ଟା ମଧ୍ୟରେ ଅନୁଭୂତ ହେବାର ଆଶଙ୍କା ମଧ୍ୟ ରହିଛି ।