ରାୟପୁର: ଛତିଶଗଡରେ ଭୟଙ୍କର ସଡକ ଦୁର୍ଘଟଣା । କାର୍ଯ୍ୟକ୍ରମରେ ଯୋଗ ଦେଇ ଘରକୁ ଫେରୁଥିବା ବେଳେ ଟ୍ରକ ସହ ମୁହାଁମୁହିଁ ଧକ୍କା ହେଲା ପିକଅପ ଭ୍ୟାନ । 6 ଜଣଙ୍କର ମୃତ୍ୟୁ ହୋଇଥିବା ବେଳେ 10 ଜଣ ଆହତ ହୋଇଥିବା ସୂଚନା ମିଳିଛି । ରବିବାର ରାତିରେ ବଲୋଦାବଜାରରେ ଏହି ଦୁର୍ଘଟଣା ଘଟିଥିବା ଜଣାପଡିଛି । ମୃତକଙ୍କ ମଧ୍ୟରେ 5 ଜଣ ମହିଳା ରହିଥିବା ବେଳେ ଜଣେ ଶିଶୁ ରହିଛି ।
ଆହତଙ୍କ ମଧ୍ୟରୁ 2 ଜଣଙ୍କ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ରାୟପୁର ହସ୍ପିଟାଲକୁ ସ୍ଥାନାନ୍ତର କରାଯାଇଛି । ଦୁର୍ଘଟଣା ଜନିତ ମୃତ୍ୟୁ ସଂଖ୍ୟା ବଢିବା ନେଇ ଆଶଙ୍କା କରାଯାଉଛି । ଗତକାଲି(ରବିବାର) ରାତି ପ୍ରାୟ 10ଟା 30 ମିନିଟ ସମୟରେ ପାଲାରି ଠାରୁ 6 କିଲୋମିଟର ଦୂର ଗୋଣ୍ଡା ପୁଲାଇ ନିକଟରେ ଟ୍ରକ ଓ ପିକଅପ ଭ୍ୟାନ ମୁହାଁମୁହିଁ ଧକ୍କା ହୋଇଥିଲା ।
ମିଳିଥିବା ସୂଚନା ଅନୁଯାୟୀ, ଏକ କାର୍ଯ୍ୟକ୍ରମରେ ଯୋଗ ଦେବା ପାଇଁ ପିକଅପ ଭ୍ୟାନଟି କିଛି ଯାତ୍ରୀଙ୍କୁ ନେଇ ଖାରୋରା ପୋଲିସ ଷ୍ଟେସନ ଅଞ୍ଚଳର କଙ୍କି ଗ୍ରାମକୁ ଯାଇଥିଲା । ସେଠାରୁ ଲାଟଓ୍ବାକୁ ଫେରୁଥିବା ବେଳେ ଗୋଣ୍ଡା ପୁଲାଇ ନିକଟରେ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା ପିକଅପ ଭ୍ୟାନ । ଏହା ଦେଖି ସ୍ଥାନୀୟ ଲୋକେ ଆମ୍ବୁଲାନ୍ସକୁ ଯୋଗାଯୋଗ କରିବା ସହ ପୋଲିସକୁ ଖବର ଦେଇଥିଲେ।