ଶ୍ରୀନଗର: ଜମ୍ମୁ-କାଶ୍ମୀର କିସ୍ତୱାରରେ ଭୟଙ୍କର ଭୂସ୍ଖଳନ ହୋଇଛି । ଏଥିରେ ଜଣେ ପୋଲିସ କର୍ମୀଙ୍କ ସମେତ ୪ ଜଣଙ୍କ ମୃତ୍ୟୁ ଘଟିଛି ଏବଂ ୬ ଜଣ ଆହତ ହୋଇଛନ୍ତି । ଆହତମାନଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି । ମୃତକଙ୍କ ମଧ୍ୟରେ ଜଣେ ଜେସିବି ଡ୍ରାଇଭର ଓ ଶ୍ରମିକ ରହିଛନ୍ତି । ଗତକାଲି(ଶନିବାର) କିସ୍ତୱାରରେ ଏକ ନିର୍ମାଣଧୀନ ମେଗା ବିଦ୍ୟୁତ ପ୍ରକଳ୍ପ ନିକଟରେ ଏହି ଭୂସ୍ଖଳନ ହୋଇଥିବା ସୂଚନା ମିଳିଛି ।
ସୂଚନା ମୁତାବକ, ଭୂସ୍ଖଳନ ଯୋଗୁଁ କିଛି ଲୋକ ମାଟି ଅତଡା ତଳେ ଦବି ଯାଇଥିଲେ । ସେମାନଙ୍କୁ ଉଦ୍ଧାର କରାଯାଉଥିବା ସମୟରେ ପୁଣିଥରେ ଭୂସ୍ଖଳନ ହୋଇଥିଲା । ଯାହାଫଳରେ ଉଦ୍ଧାରରେ ସାମିଲ ହୋଇଥିବା ଲୋକେ ମଧ୍ୟ ଫସି ଯାଇଥିଲେ । ବର୍ତ୍ତମାନ ଉଦ୍ଧାର କାର୍ଯ୍ୟ ସରିଥିବା ବେଳେ ଜଣେ ପୋଲିସ କର୍ମୀ ଓ ଜେସିବି ଡ୍ରାଇଭରଙ୍କ ସମେତ ମୋଟ ୪ ଜଣଙ୍କ ମୃତଦେହ ଉଦ୍ଧାର ହୋଇଛି । ସେହିପରି ୬ ଜଣଙ୍କୁ ଆହତ ଅବସ୍ଥାରେ ବାହାର କରାଯାଇ ମେଡିକାଲରେ ଭର୍ତ୍ତି କରାଯାଇଛି । କିସ୍ତୱାର ଡେପୁଟି କମିଶନର ଦେବାଂଶ ଯାଦବ ଏନେଇ ସୂଚନା ଦେଇଛନ୍ତି ।