ଲକ୍ଷ୍ନୌ:ଆଜି ଉତ୍ତରପ୍ରଦେଶ ସୁଲତାନପୁର ଜିଲ୍ଲା କରୱାଲ ଖେରୀରେ ପୂର୍ବାଞ୍ଚଳ ଏକ୍ସପ୍ରେସ-ୱେର ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ହେଲେ ପିଏମଙ୍କ ପୂର୍ବରୁ ଏକ୍ସପ୍ରେସ-ୱେର ଉଦଘାଟନ କଲା ସାମଜବାଦୀ ପାର୍ଟି । ଆଜି ସକାଳୁ ପୂର୍ବାଞ୍ଚଳ ଏକ୍ସପ୍ରେସ-ୱେର ବିଭିନ୍ନ ସ୍ଥାନରେ ସାଇକେଲ ଚଳାଇ ସପା କର୍ମୀ ଏହାକୁ ଉଦଘାଟନ କରିଛନ୍ତି । ସପା କର୍ମୀଙ୍କ ସାଇକେଲ ଚଲାଇବାର ଫଟୋକୁ ନିଜ ଟ୍ବିଟର ହ୍ୟାଣ୍ଡଲରେ ପୋଷ୍ଟ କରିଛନ୍ତି ଖୋଦ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ।
ମୋଦିଙ୍କ ଏହି ଉଦଘାଟନୀ କାର୍ଯ୍ୟକ୍ରମକୁ ନେଇ ଅଖିଳେଶ ବ୍ୟଙ୍ଗାତ୍ମକ ଶୈଳୀରେ କହିଛନ୍ତି, ଫିତା ଆସିଲା ଲକ୍ଷ୍ନୌରୁ ଏବଂ କଇଁଚି ଆସିଲା ଦିଲ୍ଲୀରୁ । ସପା କାର୍ଯ୍ୟର ଶ୍ରେୟ ନେବାକୁ ଚାଲିଛି ଏଠାରେ ଟଣାଓଟରା । ଅର୍ଥାତ୍ ପୂର୍ବାଞ୍ଚଳ ଏକ୍ସପ୍ରେସ-ୱେ କାର୍ଯ୍ୟ ସମାଜବାଦୀ ପାର୍ଟିର କିନ୍ତୁ ବିଜେପି ସରକାର ଏହାର ଶ୍ରେୟ ନେବାକୁ ବସିଛନ୍ତି ବୋଲି କହିଛନ୍ତି ଅଖିଳେଶ ।