ହାଇଦ୍ରାବାଦ:ତେଲେଙ୍ଗାନା ରାଜଧାନୀ ହାଇଦ୍ରାବାଦର ଘୋଷାମହଲ ଅଞ୍ଚଳରେ ଶୁକ୍ରବାର ଅପରାହ୍ନରେ ଧସିଛି ରାସ୍ତା (Road caves in Hyderabad) । ଫଳରେ ରାସ୍ତା ଉପରେ ଥିବା ପରିବା ଦୋକାନଠୁ ଆରମ୍ଭ କରି କାର, ଅଟୋ ଓ ବିଭିନ୍ନ ଯାନ ମାଟି ତଳକୁ ଖସିପଡ଼ିଥିବା ଦେଖିବାକୁ ମିଳିଛି । ତେବେ ଏଥିରେ କେହି ଆହତ ହୋଇନଥିବା ବେଳେ ଅଘଟଣ ଯୋଗୁଁ ଯାତାୟାତ ପ୍ରଭାବିତ ହୋଇଥିବା ନେଇ ପୋଲିସ ସୂଚନା ଦେଇଛି ।
ଘଟଣା ସମ୍ପର୍କରେ ଖବର ପାଇବା ପରେ ପୋଲିସ ଓ ଗ୍ରେଟର ହାଇଦ୍ରାବାଦ ମୁନିସିପାଲ କର୍ପୋରେସନ (GHMC) ଘଟଣାସ୍ଥଳରେ ପହଞ୍ଚିଥିବା ବେଳେ ଏବେ ସ୍ଥିତି ନିୟନ୍ତ୍ରଣରେ ରହିଛି । ଧସିଯାଇଥିବା ରାସ୍ତା ତଳେ ଏକ ୱାଟରଲାଇନ ରହିଛି, ଏଥିଲାଗି ରାସ୍ତା ଧସିଥିବା ନେଇ ପ୍ରାଥମିକ ତଦନ୍ତରୁ ସନ୍ଦେହ କରିଛି ପୋଲିସ । ଏନେଇ ପୋଲିସ କହିଛି ଯେ ସେ ଘଟଣା ସମ୍ପର୍କରେ ଖବର ପାଇବା ପରେ ତୁରନ୍ତ ଘୋଷାମହଲ ନିକଟ ଚକନାୱାଡି ଅଞ୍ଚଳରେ ପହଞ୍ଚିଥିଲେ । ହଠାତ ଏହି ରୋଡ୍ଟି ଧସିପଡ଼ିଥିଲା ବୋଲି ସ୍ଥାନୀୟ ଲୋକେ କହିଛନ୍ତି ।