ନୂଆଦିଲ୍ଲୀ:ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ପୂର୍ବରୁ ଏହି ପ୍ରସଙ୍ଗରେ ଉତ୍ତେଜନା ସୃଷ୍ଟିକାରୀ ବୟାନ ଦେଇଥିବା ଅଭିଯୋଗରେ AIMIM ମୁଖ୍ୟ ତଥା ହାଇଦ୍ରାବାଦ ସାଂସଦ ଅସଦୁଦ୍ଦିନ ଓଓ୍ବେସୀଙ୍କ ବିରୋଧରେ ଥାନାରେ ଏତଲା । ହିନ୍ଦୁ ସେନା ରାଷ୍ଟ୍ରୀୟ ସଭାପତି ବିଷ୍ଣୁ ଗୁପ୍ତା ଦିଲ୍ଲୀ ପୋଲିସରେ ଏହି ଏତଲା ଦେଇଛନ୍ତି । ଏକ କାର୍ଯ୍ୟକ୍ରମରେ ଭାଷଣ ଦେବା ସମୟରେ ରାମ ମନ୍ଦିର ଓ ବାବ୍ରୀ ମସଜିଦ ପ୍ରସଙ୍ଗରେ ସେ ମୁସଲିମ ଯୁବକଙ୍କୁ ଉତ୍ତେଜିତ କରିବା ପରି ଭାଷଣ ଦେଇଥିବା ଅଭିଯୋଗ କରାଯାଇଛି । ଅନ୍ୟପଟେ ଓଓ୍ବେସୀ ନିଜ ‘ଏକ୍ସ’ ହ୍ୟାଣ୍ଡେଲରେ ଏହି ସମ୍ବୋଧନର ଏକ କ୍ଲିପ୍ ସେୟାର କରିଥିଲେ । ଏହାକୁ ରିଟ୍ବିଟ କରି ବିଜେପି ମିଡିଆ ସେଲ ମୁଖ୍ୟ ଅମିତ ମାଲବ୍ୟ ମଧ୍ୟ ଓଓ୍ବେସୀଙ୍କ ଉପରେ ବର୍ଷିଛନ୍ତି ।
ଅଭିଯୋଗକାରୀ ବିଷ୍ଣୁ ଗୁପ୍ତାଙ୍କ ଅଭିଯୋଗ ଅନୁସାରେ, ରାମ ମନ୍ଦିର ପ୍ରତିଷ୍ଠା ପୂର୍ବରୁ ଓଓ୍ବେସୀ ନିଜ ଭାଷଣ ମାଧ୍ୟମରେ ମୁସଲିମ ଯୁବକଙ୍କୁ ଉତ୍ତେଜିତ କରିବାକୁ ପ୍ରାୟସ କରିଛନ୍ତି । ସେମାନେ ଏକତ୍ରୀତ ହୋଇ ନିଜର ଶକ୍ତି ବଢାନ୍ତୁ ଓ ନିଜ ମସଜିଦର ରକ୍ଷା କରନ୍ତୁ ବୋଲି କହିଛନ୍ତି । ସର୍ବୋଚ୍ଚ କୋର୍ଟଙ୍କ ରାୟ ଆସିବା ପରେ ସେଠରେ ମନ୍ଦିର ନିର୍ମାଣ କାର୍ଯ୍ୟ ଆରମ୍ଭ ହେଲା । ମୁସଲିମ ପକ୍ଷକୁ ମଧ୍ୟ ଅନ୍ୟ ଏକ ସ୍ଥାନରେ ମସଜିଦ ନିର୍ମାଣ କରିବା ପାଇଁ ଜମି ମଧ୍ୟ ପ୍ରଦାନ କରାଯାଇଛି । ମାତ୍ର ଏବେ ଓଓ୍ବେସୀଙ୍କର ଏପରି ମନ୍ତବ୍ୟ ସାମାଜିକ ଐକ୍ୟ ଓ ସଦଭାବନାକୁ ନଷ୍ଟ କରିବା ଉଦ୍ଦେଶ୍ୟରେ । ତେଣୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ବୋଲି ଅଭିଯୋଗରେ ନିବେଦନ କରାଯାଇଛି ।