ବେଙ୍ଗାଲୁରୁ:ଦେଶର ପ୍ରଧାନମନ୍ତ୍ରୀ ହେବେ ରାହୁଲ ଗାନ୍ଧୀ । ରାହୁଲଙ୍କୁ ନେଇ ଏପରି ଏକ ଭବିଷ୍ୟବାଣୀ କରିଛନ୍ତି କର୍ଣ୍ଣାଟକର ଲିଙ୍ଗାୟତ ସମ୍ପ୍ରଦାୟର ଜଣେ ମଠର ମହନ୍ତ । ଆଜି (ବୁଧବାର) କର୍ଣ୍ଣାଟକର ଚିତ୍ରଦୁର୍ଗାଠାରେ ଏକ ପ୍ରସିଦ୍ଧ ଲିଙ୍ଗାୟତ ସମ୍ପ୍ରଦାୟର ମଠରେ ଦୀକ୍ଷା ଗ୍ରହଣ କରିଛନ୍ତି ରାହୁଲ ଗାନ୍ଧୀ । ଏହି ଅବସରରେ ମଠାଧୀଶ ଶିବମୂର୍ତ୍ତି ମୁରୁଗା ସରଣରୁ ସ୍ବାମୀ ରାହୁଲଙ୍କୁ ଲିଙ୍ଗାୟତ ଦୀକ୍ଷାରେ ଦୀକ୍ଷିତ କରିଛନ୍ତି । କାର୍ଯ୍ୟକ୍ରମ ଅବସରରେ ମଠର ଅନ୍ୟଜଣେ ମହନ୍ତ, ରାହୁଲଙ୍କୁ ଆର୍ଶୀବାଦ ଦେବା ବେଳେ ସେ ପ୍ରଧାନମନ୍ତ୍ରୀ ହେବା ନେଇ କହିଥିବା ଦେଖିବାକୁ ମିଳିଥିଲା। ତେବେ ମୁଖ୍ୟ ମଠାଧୀଶ କିନ୍ତୁ ଏପରି ଟିପ୍ପଣୀକୁ ନେଇ ଭିନ୍ନ ବାଖ୍ୟା କରିଥିବା ଦେଖିବାକୁ ମିଳିଥିଲା ।
ମଠାଧୀଶଙ୍କ ଦ୍ବାରା ରାହୁଲ ଦୀକ୍ଷିତ ହେବା ପରେ ମଠର ଅନ୍ୟ ଜଣେ ମହନ୍ତ ହାଭେରୀ ହୋସାମତ୍ତ ସ୍ବାମୀ (Haveri Hosamutt Swami ) ରାହୁଲଙ୍କୁ ଆଶୀର୍ବାଦ କରିବା ସହ ଏପରି ଟିପ୍ପଣୀ କରିଥିଲେ । ହୋସାମତ୍ତ ସ୍ବାମୀ କହିଥିଲେ ‘‘ରାହୁଲଙ୍କ ଜେଜେ ମା’ ତଥା ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ, ପିତା ରାଜୀବ ଗାନ୍ଧୀ ମଧ୍ୟ ଏହି ମଠ ସହ ଜଡିତ ହୋଇ ଦୀକ୍ଷିତ ହୋଇଥିଲେ । ଏବେ ରାହୁଲ ମଧ୍ୟ ଦୀକ୍ଷିତ ହୋଇଛନ୍ତି । ତେଣୁ ସେ ଦିନେ ମଧ୍ୟ ନିଶ୍ଚୟ ପ୍ରଧାନମନ୍ତ୍ରୀ ହେବେ ।’’ ତେବେ ଏପରି ଟିପ୍ପଣୀରେ ହସ୍ତକ୍ଷେପ କରିଥିଲେ ମଠର ମୁଖ୍ୟ ମଠାଧୀଶ ଶିବମୂର୍ତ୍ତି ମୁରୁଗା । ସେ କହିଥଲେ ‘‘ଏମିତି କହିବା ଉଚିତ ନୁହେଁ, ଏହା ପ୍ରକୃତ ସମୟ ନୁହେଁ ବରଂ ଲୋକେ ତାହା ସ୍ଥିର କରିବେ ।’’