ଗାନ୍ଧୀନଗର: ଗୁଜୁରାଟର ମୋର୍ବି ଝୁଲାପୋଲ ଭୁଶୁଡ଼ିବା ଘଟଣାରେ ସାରା ଦେଶ ସ୍ତବ୍ଧ । ଅନେକ ନିଜ ଅତ୍ମୀୟଙ୍କୁ ହରାଇ ଭାଙ୍ଗି ପଡ଼ିଛନ୍ତି । ଏଯାବତ ମୃତ୍ୟୁସଂଖ୍ୟା 135ରେ ପହଞ୍ଚିଥିବାବେଳେ ଅନେକ ଚିକିତ୍ସିତ ହେଉଛନ୍ତି । ଏହି ଅଘଟଣରେ ଅନେକ ପରିବାର ଉଜୁଡ଼ି ଯାଇଛି । ଏହ ଏହି ଅଘଟଣ ଘଟିଥିବା ସ୍ଥାନ ଆଜି ପରିଦର୍ଶନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେ ଉଦ୍ଧାର କାର୍ଯ୍ୟରେ ଲାଗିଥିବା ସେନା ଯବାନ ଏବଂ ଉଦ୍ଧାରକାରୀ ଦଳ ସହିତ ଆଲୋଚନା କରିଛନ୍ତି । ଏହାପରେ ସେ ଏହି ଅଘଟଣରେ ଆହତ ହୋଇ ଚିକିତ୍ସିତ ହେଉଥିବା ହସ୍ପିଟାଲ ଯାଇ ଆହତଙ୍କ ସହ କଥା ହୋଇଛନ୍ତି ।
ଗତ ରବିବାର ସନ୍ଧ୍ୟାରେ ଗୁଜରାଟର ମୋର୍ବିରେ ଥିବା ୧୪୩ ବର୍ଷ ପୁରୁଣା ଏକ ଝୁଲାପୋଲର ଅଚାନକ ଖସି ପଡି଼ଥିଲା । ସେତେବେଳେ ଝୁଲାପୋଲ ଉପରେ ଶତାଧିକ ଲୋକ ଥିଲେ । ଏହାକୁ ନେଇ ଗତ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗାନ୍ଧୀନଗରର ରାଜଭବନରେ ଏକ ଉଚ୍ଚସ୍ତରୀୟ ବୈଠକ କରି ସ୍ଥିତି ସମୀକ୍ଷା କରିଥିଲେ । ଏହି ବୈଠକରେ ରାଜ୍ୟର ବରିଷ୍ଠ ଅଧିକାରୀଙ୍କ ସହ ଗୃହମନ୍ତ୍ରୀ ହର୍ଷ ସାଙ୍ଘବୀ ସାମିଲ ଥିଲେ । ଏହାପରେ ଆଜି(ମଙ୍ଗଳ) ଖୋଦ୍ ପ୍ରଧାନମନ୍ତ୍ରୀ ଘଟଣାସ୍ଥଳରେ ପହଞ୍ଚି ସ୍ଥିତି ସମୀକ୍ଷା କରିଛନ୍ତି ।