ନୂଆଦିଲ୍ଲୀ: ଆଜି ଆଲୋକର ପର୍ବ ଦୀପାବଳି । ବିନା ବାଣରେ ଦୀପାବଳି ପାଳିବେ ଦେଶବାସୀ । ସନ୍ଧ୍ୟା ସମୟରେ ଦୀପ ଓ ରଙ୍ଗୀନ ଆଲୋକ ମାଳାରେ ଝଲସି ଉଠିବ ପୁରପଲ୍ଲୀ । ଏନେଇ ଉତ୍ସବମୁଖର ଗାଁଠୁ ସହର । ଏହି ଅବସରରେ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦୀପାବଳି ଶୁଭ ଅବସରରେ ଦେଶବାସୀଙ୍କ ଶୁଭେଚ୍ଛା ଜଣାଇଥିବା ନେଇ ରାଷ୍ଟ୍ରପତିଙ୍କ କାର୍ଯ୍ୟାଳୟ ତରଫରୁ ଏକ ପ୍ରେସ ବିଜ୍ଞପ୍ତି ଜାରି କରାଯାଇଛି । ସେଥିରେ ଉଲ୍ଲେଖ ରହିଛି ଯେ, ସମସ୍ତଙ୍କୁ ଦୀପାବଳିର ଶୁଭେଚ୍ଛା । ଦୀପାବଳି ଆନନ୍ଦ ଏବଂ ଖୁସିର ପର୍ବ ଅଟେ । ଏହା ଅନ୍ଧକାର ଉପରେ ଆଲୋକର ବିଜୟ, ଅସତ୍ୟ ଉପରେ ସତ୍ୟ ଏବଂ ଅନ୍ୟାୟ ଉପରେ ନ୍ୟାୟର ବିଜୟ ଅବସରରେ ପାଳନ କରାଯାଏ । ବିଭିନ୍ନ ଧର୍ମର ଲୋକମାନେ ଏହି ପର୍ବ ପାଳନ କରନ୍ତି ଏବଂ ପ୍ରେମ, ଭାଇଚାରାର ବାର୍ତ୍ତା ବାଟନ୍ତି । ଏହି ପର୍ବ ଦୟା, ସକରାତ୍ମକତା ଏବଂ ସମୃଦ୍ଧିର ପ୍ରତୀକ ଅଟେ । ଗୋଟିଏ ଦୀପ ଅନେକଙ୍କୁ ଆଲୋକିତ କରିପାରେ । ଆଲୋକର ପର୍ବକୁ ସୁରକ୍ଷିତ ଭାବରେ ପାଳନ କରନ୍ତୁ ଏବଂ ପରିବେଶ ସୁରକ୍ଷାରେ ଅଂଶ ଗ୍ରହଣ କରି ରାଷ୍ଟ୍ର ଗଠନ କରିବାକୁ ପ୍ରତିଶ୍ରୁତି ଦିଅନ୍ତୁ ।