ନୂଆଦିଲ୍ଲୀ: କେନ୍ଦ୍ର ସରକାର ଆଣିଥିବା ସେନାରେ ଭର୍ତ୍ତି ଯୋଜନା ‘ଅଗ୍ନିପଥ’କୁ ନେଇ ଗୋଟିଏ ପରେ ଗୋଟିଏ ବିବାଦ ମୁଣ୍ଡ ଟେକିବାରେ ଲାଗିଛି । ତେବେ ଗତ କିଛି ଦିନ ଧରି ନିଯୁକ୍ତି ପ୍ରକ୍ରିୟାରେ ଆବେଦନକାରୀଙ୍କ ଠାରୁ ଜାତିଗତ ପ୍ରମାଣପତ୍ର ମଗାଯାଉଥିବା ନେଇ ହୋଇଥିବା ଅଭିଯୋଗକୁ ଖଣ୍ଡନ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ଅଭିଯୋଗକୁ ଗୁଜବ କହିବା ସହ ସ୍ବାଧୀନତା ପୂର୍ବବର୍ତ୍ତୀ ସମୟରୁ ଯେଉଁ ପ୍ରକ୍ରିୟାରେ ସେନାରେ ଭର୍ତ୍ତି ହେଉଥିଲା, ସେହି ପ୍ରକ୍ରିୟା ଏବେ ମଧ୍ୟ ଜାରି ରହିଥିବା ରାଜନାଥ କହିଛନ୍ତି । ସିଂ ଆହୁରି ମଧ୍ୟ କହିଛନ୍ତି, ଅଦ୍ୟାବଧି ସେଥିରେ କୌଣସି ପରିବର୍ତ୍ତନ କରାଯାଇନାହିଁ ।
ଆଜି ସଂସଦ ଭବନ ପରିସରରେ ଗଣମାଧ୍ୟମର ଏହି ଅଭିଯୋଗ ସମ୍ପର୍କିତ ପ୍ରଶ୍ନରେ ରାଜନାଥ କହିଛନ୍ତି, ‘‘ଏପ୍ରକାର ଚର୍ଚ୍ଚା କେବଳ ଏକ ଗୁଜବ ମାତ୍ର । ସ୍ବାଧୀନତା ପୂର୍ବରୁ ଯେଉଁ ପ୍ରକ୍ରିୟାରେ ଭର୍ତ୍ତି ହେଉଥିଲା, ସେଥିରେ କୌଣସି ପ୍ରକାର ପରିବର୍ତ୍ତନ କରାଯାଇନାହିଁ । ଏହା ପରେ କୌଣସି ପ୍ରକାର ସ୍ଷଷ୍ଟୀକରଣ ରଖିବାର ଆବଶ୍ୟକତା ନାହିଁ ।’’ ତେବେ ଏହି ଯୋଜାନରେ ଭର୍ତ୍ତି ପାଇଁ ଆବେଦନକାରୀଙ୍କୁ ଜାତିଗତ ପ୍ରମାଣପତ୍ର ଦାଖଲ କରିବାକୁ କୁହାଯାଉଥିବା ବିରୋଧୀ ଅଭିଯୋଗ କରିବା ସହ କେନ୍ଦ୍ର ସରକାରଙ୍କୁ ସମାଲୋଚନା କରିଥିଲେ । ଅଗ୍ନିପଥ ଯୋଜନାରେ ଭର୍ତ୍ତି ହେବାକୁ ଆଶାୟୀଙ୍କ ଠାରୁ ଜାତିଗତ ପ୍ରମାଣପତ୍ର ମଗାଯାଉଥିବା AAP ରାଜ୍ୟସଭା ସାଂସଦ ସଞ୍ଜୟ ସିଂ ପ୍ରଥମେ ଅଭିଯୋଗ ଉଠାଇଥିଲେ । ପରେ ଏନେଇ ଚର୍ଚ୍ଚା ବଢିବା ସହ ସରକାରଙ୍କୁ ମଧ୍ୟ ସାମାଲୋଚନା କରାଯିବା ଆରମ୍ଭ ହୋଇଥିଲା ।