ଗାନ୍ଧୀନଗର:ଆସନ୍ତାକାଲି 10ମ ଭାଇବ୍ରାଣ୍ଟ ଗୁଜୁରାଟ ଗ୍ଲାବାଲ ସମ୍ମିଳନୀ ପୂର୍ବରୁ ଆଜି ଅହମ୍ମଦାବାଦରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ରାଷ୍ଟ୍ରପତି ଶେଖ ମହମ୍ମଦ ବିନ ଜାଏଦ ଅଲ ନ୍ୟାହାନଙ୍କ ସହ ରୋଡ ସୋ’ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ ଗୁଜୁରାଟ ଆସିଥିବା ଅତିଥି ରାଷ୍ଟ୍ରପତି ନ୍ୟାହାନ ଅହମ୍ମଦାବାଦ ସ୍ଥିତ ସର୍ଦ୍ଦାର ପଟେଲ ଅନ୍ତର୍ଜାତୀୟ ବିମାନ ବନ୍ଦରରେ ଅବତରଣ କରିବା ପରେ ପ୍ରଧାନମନ୍ତ୍ରୀ ମୋଦି ତାଙ୍କୁ ସ୍ବାଗତ କରିଥିଲେ । ଏହା ପରେ ଉଭୟ ନେତା ଏକାଠି ମିଳିତ ରୋଡ ସୋ’ ରେ ଅଂଶଗ୍ରହଣ କରିଥିଲେ । ଦୁଇ ରାଷ୍ଟ୍ରମୁଖ୍ୟଙ୍କୁ ଗୋଟିଏ କାରରେ ଦେଖିବାକୁ ମିଳିଥିଲା । ଅହମ୍ମଦାବାଦରୁ ଗାନ୍ଧୀନଗର ପର୍ଯ୍ୟନ୍ତ 15 ମିନିଟ ଧରି ପ୍ରାୟ 3 କି.ମି ରାସ୍ତାରେ ଏହି ରୋଡ ସୋ’ କରିଥିଲେ ଉଭୟ ନେତା । ଏଥିପାଇଁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା ।
ଆସନ୍ତାକାଲି (ବୁଧବାର) ଗାନ୍ଧୀନଗରର ଗାନ୍ଧୀ ମନ୍ଦିର କନଭେନସନ ସେଣ୍ଟରରେ ଭାଇବ୍ରାଣ୍ଟ ଗୁଜୁରାଟ ଗ୍ଲୋବାଲ ସମ୍ମିଟ୍(VGGS)ର 10ମ ସଂସ୍କରଣ ଅନୁଷ୍ଠିତ ହେବାକୁ ଯାଉଛି । ଏହାକୁ ପ୍ରଧାନମନ୍ତ୍ରୀ ମୋଦି ଉଦଘାଟନ୍ କରିବେ । ଏଥିରେ ଏକାଧିକ ରାଷ୍ଟ୍ରମୁଖ୍ୟ ଓ ବ୍ୟବସାୟିକ କମ୍ପାନୀର ମୁଖ୍ୟମାନେ ଅଂଶଗ୍ରହଣ କରିବେ । ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ ସଂଯୁକ୍ତ ଆରବ ଏମିରେଟ୍ସର ରାଷ୍ଟ୍ରପତି ନ୍ୟାହାନ ଅହମ୍ମଦାବାଦରେ ପହଞ୍ଚିଛନ୍ତି । ଆଜି (ମଙ୍ଗଳବାର) ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ ମୋଦି ଗୁଜୁରାଟ ଗ୍ଲୋବାଲ ଟ୍ରେଡ ସୋ’ର ମଧ୍ୟ ଶୁଭାରମ୍ଭ କରିଛନ୍ତି ।