ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି (ଶୁକ୍ରବାର) ୱାଲ୍ଡ ଫୁଡ ଇଣ୍ଡିଆ ଦ୍ବିତୀୟ ସଂସ୍କରଣର ଉଦଘାଟନ କରିବେ । ଜାତୀୟ ରାଜଧାନୀ ଦିଲ୍ଲୀର ପ୍ରଗତି ମୈଦାନ ଭାରତ ମଣ୍ଡପମରେ ଏହି ମେଗା ଇଭେଣ୍ଟର ଶୁଭାରମ୍ଭ କରିବେ ପ୍ରଧାନମନ୍ତ୍ରୀ ମୋଦି । ପୂର୍ବାହ୍ନ 10ଟାରେ ଏହି କାର୍ଯ୍ୟକ୍ରମ ଆରମ୍ଭ ହେବ । ଏହି ଅବସରରେ ସ୍ବୟଂ ସହାୟକ ଗୋଷ୍ଠୀକୁ ସଶକ୍ତ କରିବାକୁ 1 ଲକ୍ଷରୁ ଅଧିକ ଏସଏଚଜି ସଦସ୍ୟଙ୍କୁ ସହୟତା ରାଶି ପ୍ରଦାନ କରିବେ ।
ପ୍ରଧାନମନ୍ତ୍ରୀ କାର୍ଯ୍ୟାଳୟରୁ ମିଳିଥିବା ସୂଚନା ଅନୁସାରେ, ଏହି କାର୍ଯ୍ୟକ୍ରମ ଜରିଆରେ 1 ଲକ୍ଷରୁ ଅଧିକ ଏସଏଚଜି ସଦସ୍ୟଙ୍କୁ ସହାୟତା ପ୍ରଦାନ କରାଯିବ । ଏହା SHG ଗୁଡିକୁ ଉନ୍ନତ ପ୍ୟାକେଜିଂ ଏବଂ ଗୁଣବତ୍ତା ଉତ୍ପାଦନ ମାଧ୍ୟମରେ ବଜାରରେ ଉଚିତ ମୂଲ୍ୟ ଦେବାରେ ସହାୟକ ହେବ । ଏହା ସହିତ ପ୍ରଧାନମନ୍ତ୍ରୀ ୱାଲ୍ଡ ଫୁଡ ଇଣ୍ଡିଆର ଅଂଶ ଭାବେ ଫୁଡ ଷ୍ଟ୍ରିଟର ଉଦଘାଟନ କରିବେ ।
ଏଥିରେ 200ରୁ ଅଧିକ ସେଫ୍ ଅଂଶଗ୍ରହଣ କରିବେ । ଏଥିରେ ସ୍ଥାନୀୟ ଓ ରାଜକୀୟ ଖାଦ୍ୟ ପ୍ରଦର୍ଶିତ ହେବ । ଏଥିରେ ଅଂଶଗ୍ରହଣ କରିଥିବା ସେଫ ନିଆରା ଅନୁଭୂତି ସାଉଁଟିବେ । ଏଥିରେ ପାରମ୍ପରିକ ଭାରତୀୟ ବ୍ୟଞ୍ଜନକୁ ନିଆରା ଢଙ୍ଗରେ ପ୍ରଦର୍ଶିତ କରାଯିବ । ଭାରତକୁ ବିଶ୍ବର ଫୁଡ ବାସ୍କେଟ 'Food basket of the world' ଭାବେ ପ୍ରଦର୍ଶନ କରିବା ସହ 2023ରୁ ଆନ୍ତର୍ଜାତୀୟ ମିଲେଟ ବର୍ଷ ଭାବରେ ପାଳନ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ । ଏହା ସରକାରୀ ସଂସ୍ଥା, ଶିଳ୍ପ, ଚାଷୀ, ଉଦ୍ୟୋଗୀ ଏବଂ ଅନ୍ୟାନ୍ୟ ହିତାଧୀକାରୀଙ୍କୁ ବ୍ୟବସାୟ ଓ ନେଟୱାର୍କିଂ ନେଇ ପ୍ଲାଟଫର୍ମ ଯୋଗାଇବ । ଏହି କାର୍ଯ୍ୟକ୍ରମରେ ପୁଞ୍ଜି ବିନିଯୋଗ ଓ ଇଜ ଅଫ୍ ଡୁଇଙ୍ଗ ବିଜନେସ ନେଇ ସିଇଓଙ୍କ ମଧ୍ୟରେ ବୈଠକ ହେବ ।