ଗାନ୍ଧୀନଗର:ଗୁଜୁରାଟରେ ଜାମନଗରରେ ବିଶ୍ବ ସ୍ବାସ୍ଥ୍ୟ ସଂଗଠନ WHOର ଗ୍ଲୋବାଲ ଟ୍ରାଡିସିନାଲ ମେଡିସିନ ସେଣ୍ଟର (WHO-Global Centre for Traditional Medicine) ଉଦଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ଉତ୍ସବରେ WHO ମହାନିର୍ଦ୍ଦେଶକ ଡକ୍ଟର ଟେଡ୍ରୋସ୍ ଆଡାନୋମ୍ ଗେବ୍ରେଏସ୍, ମରିଶସ ପ୍ରଧାନମନ୍ତ୍ରୀ ପ୍ରବୀନ୍ଦ କୁମାର ଜଗନ୍ନାଥ, ଗଜୁରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ, କେନ୍ଦ୍ର ଆୟୁଷ ମନ୍ତ୍ରୀ ସର୍ବାନନ୍ଦ ସୋନଓ୍ବାଲ ମଧ୍ୟ ସାମିଲ ହୋଇଛନ୍ତି ।
ସେହିପରି ବାଂଲାଦେଶ ପ୍ରଧାନମନ୍ତ୍ରୀ ସେଖ ହସିନା, ନେପାଳ ପ୍ରଧାନମନ୍ତ୍ରୀ ସେର ବାହାଦୂର ଦେଉବା ମଧ୍ୟ ଭର୍ଚ୍ଚୁଆଲି ଏହି କାର୍ଯ୍ୟକ୍ରମରେ ସାମିଲ ହୋଇଛନ୍ତି । ବିଶ୍ବ ସ୍ବାସ୍ଥ୍ୟ ସଂଗଠନ (WHO)ର ମହାନିର୍ଦ୍ଦେଶକ ଗୁଜୁରାଟୀ ଭାଷାରେ କାର୍ଯ୍ୟକ୍ରମକୁ ସମ୍ବୋଧିତ କରିବା ସହ ଭାରତ ସହ ତାଙ୍କର ବ୍ୟକ୍ତିଗତ ତଥା ସ୍ବତନ୍ତ୍ର ସମ୍ପର୍କ ରହିଥିବା କହିଛନ୍ତି । ଭାରତରେ ପାରମ୍ପାରିକ ଚିକିତ୍ସା ପ୍ରଣାଳୀର ପ୍ରାଚୀନତମ ପରମ୍ପରା ରହିଥିବା କହିବା ସହ ସେ ଅନେକ କିଛି ଶିଖିବାର ଅବସର ମଧ୍ୟ ପାଇଥିବା କହିଛନ୍ତି ।
କୋଭିଡ ମହାମାରୀ ସମୟରେ ଭାରତ-ବାଂଲାଦେଶ ଉଭୟ ଭଲ ପଡୋଶୀ ଭାବେ ସହଭାଗୀତାର ସହ ମହାମାରୀର ମୁକାବିଲା କରିଛନ୍ତି । ଔଷଧ ଓ ଚିକିତ୍ସା ସାମଗ୍ରୀର ଆଦାନ ପ୍ରଦାନ ଦୁଇ ଦେଶର ସମ୍ପର୍କର ପରିଚୟ ଦେଇଛି କହିଛନ୍ତି ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା । ସେହିପରି ଗ୍ଲୋବାଲ ଟ୍ରାଡିସିନାଲ ମେଡିସିନ ସେଣ୍ଟର ପ୍ରତିଷ୍ଠା ପାଇଁ ଭାରତ ଓ ବିଶ୍ବ ସ୍ବାସ୍ଥ୍ୟ ସଂଗଠନକୁ ଧନ୍ୟବାଦ ଦେଉଥିବା ନିଜ ସମ୍ବୋଧନରେ ଉଲ୍ଲେଖ କରିଛନ୍ତି ବାଂଲାଦେଶ ପ୍ରଧାନମନ୍ତ୍ରୀ ଶେଖ ହାସିନା । ହାସିନା ଭର୍ଚ୍ଚୁଆଲି କାର୍ଯ୍ୟକ୍ରମରେ ସାମିଲ ହୋଇ ସମ୍ବୋଧିତ କରିଛନ୍ତି ।