Co-WINରୁ ତଥ୍ୟ ଲିକ୍‌ ହେଉଥିବା ଅଭିଯୋଗ, ସ୍ପଷ୍ଟୀକରଣ ରଖିଲେ କେନ୍ଦ୍ର ସରକାର

କୋଭିଡ-୧୯ ଟିକା ପଞ୍ଜୀକରଣ ପୋର୍ଟାଲ 'କୋୱିନ'ରୁ ତଥ୍ୟ ଲିକ୍‌ ହେଉଥିବା ନେଇ ବିରୋଧୀଙ୍କ ଅଭିଯୋଗ । ସଷ୍ଟୀକରଣ ରଖିଲେ କେନ୍ଦ୍ର ସରକାର । ଅଧିକ ପଢ଼ନ୍ତୁ

ନୂଆଦିଲ୍ଲୀ: କୋଭିଡ-୧୯ ଟିକା ପଞ୍ଜୀକରଣ ପୋର୍ଟାଲ 'କୋୱିନ'କୁ ନେଇ ସାଂଘାତିକ ଖବର ସାମ୍ନାକୁ ଆସିଛି । ଟୀକାକରଣକୁ ଟ୍ରାକ କରୁଥିବା ଆପ୍‌ ଲୋକଙ୍କ ତଥ୍ୟ ଲିକ୍‌ କରୁଥିବା ଅଭିଯୋଗ ହୋଇଛି । ଟେଲିଗ୍ରାମ ବୋଟ ଦ୍ବାରା ସମସ୍ତ ଡାଟାକୁ ସେୟାର କରାଯାଉଥିବା କୁହାଯାଉଛି । ଏହି ସବୁ ତଥ୍ୟ ଗୁଡ଼ିକ ଇଣ୍ଟରନେଟରେ ଉପଲବ୍ଧ ହୋଇଛି । ସବୁଠୁ ବଡ଼ କଥା ହେଲା, ବଡ଼ବଡ଼ ନେତାମନ୍ତ୍ରୀଙ୍କ ବ୍ୟକ୍ତିଗତ ତଥ୍ୟର ସ୍କ୍ରିନ୍‌ସଟ୍‌ ମୋବାଇଲରୁ ମୋବାଇଲକୁ ଘୁରି ବୁଲୁଛି । ଏହି ଖବର ସାମ୍ନାକୁ ଆସିବା ପରେ କେନ୍ଦ୍ର ସରକାର ସ୍ପଷ୍ଟୀକରଣ ରଖିଛନ୍ତି ।

'କୋୱିନ' ଆପ ମାଧ୍ୟମରେ ଲୋକଙ୍କ ବ୍ୟକ୍ତିଗତ ତଥ୍ୟ ଲିକ ହେଉଥିବା ନେଇ ବିରୋଧୀ ଦଳ ନେତାଙ୍କ ପକ୍ଷରୁ ଦାବି କରାଯାଇଛି । ଟିଏମ୍‌ସି ନେତା ସାକେତ ଗୋଖଲେ ଟ୍ବିଟ୍‌ କରି କେନ୍ଦ୍ର ସରକାରଙ୍କ 'କୋୱିନ୍‌' ଆପ ଉପରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେ, କୋଭିଡ-୧୯ ଟୀକାକରଣ ଟ୍ରାକିଂ ପ୍ଲାଟଫର୍ମ 'କୋୱିନ'ରେ ଅନେକ ଲୋକଙ୍କ ତଥ୍ୟ ଲିକ୍‌ ହୋଇଛି । ଏହି ଆପରେ ଟିକା ନେଇଥିବା ସମସ୍ତ ଭାରତୀୟଙ୍କ ବ୍ୟକ୍ତିଗତ ତଥ୍ୟ, ମୋବାଇଲ ନମ୍ବର, ଆଧାର ନମ୍ବର, ପାସପୋର୍ଟ ନମ୍ବର, ଭୋଟ ପରିଚୟ ପତ୍ର, ପରିବାର ସଦସ୍ୟଙ୍କ ବିବରଣୀ ଇତ୍ୟାଦି ରହିଛି । ଏହି ତଥ୍ୟଗୁଡ଼ିକ ଲିକ୍‌ ହୋଇସାରିଛି ଏବଂ ଇଣ୍ଟରନେଟ୍‌ରେ ମାଗଣାରେ ଉପଲବ୍ଧ ହେଉଛି । ବହୁ ବଡ଼ବଡ଼ ନେତାଙ୍କ ତଥ୍ୟ ମଧ୍ୟ ଲିକ୍‌ ହୋଇଛି । ଯେଉଁଥିରେ ରାଜ୍ୟସଭା ସାଂସଦ ତଥା ଟିଏମ୍‌ସି ନେତା ଡେରେକ ଓ ବ୍ରାୟନ, ପୂର୍ବତନ କେନ୍ଦ୍ରମନ୍ତ୍ରୀ ପି. ଚିତାମ୍ବରମ, କଂଗ୍ରେସ ନେତା ଜୟରାମ ରମେଶ ଏବଂ କେସି ବେଣୁଗୋପାଲ, ରାଜ୍ୟସଭା ଉପାଧ୍ୟକ୍ଷ ହରିବଂଶ ନାରାୟଣ ସିଂ, ରାଜ୍ୟସଭା ସାଂସଦ ସୁସ୍ମିତା ଦେବ ଏବଂ ସଞ୍ଜୟ ରାୱତଙ୍କ ସମେତ ଅନେକ ନେତା ସାମିଲ ଅଛନ୍ତି । ଟେଲିଗ୍ରାମ ବୋଟର ସମସ୍ତ ରାଜନେତାଙ୍କ ବ୍ୟକ୍ତିଗତ ତଥ୍ୟର ସ୍କ୍ରିନସଟ୍‌ ଘୁରି ବୁଲୁଛି ।

ସାକେତ ଗୋଖଲେ ପ୍ରଶ୍ନ କରିଛନ୍ତି, ମୋଦି ସରକାର ଯେତେବେଳେ ଲୋକଙ୍କ ବ୍ୟକ୍ତିଗତ ତଥ୍ୟକୁ ସୁରକ୍ଷା ଦିଆଯାଉଥିବା ଦାବି କରୁଛନ୍ତି, ସେତେବେଳେ ସାଧାରଣ ଲୋକଙ୍କ ପାସପୋର୍ଟ ନମ୍ବର, ଆଧାର ନମ୍ବର ଇତ୍ୟାଦି କିପରି ଲିକ୍‌ ହେଲା ? ଏହା ସମଗ୍ର ଦେଶ ପାଇଁ ଚିନ୍ତାର ବିଷୟ । ଅନ୍ୟପଟେ ବିରୋଧିଙ୍କ ଦାବି ପରେ ସ୍ପଷ୍ଟୀକରଣ ରଖିଛନ୍ତି କେନ୍ଦ୍ର ସରକାର । କେନ୍ଦ୍ର ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ରାଜୀବ ଚନ୍ଦ୍ର ଶେଖର କରିଛନ୍ତି," 'କୋୱିନ୍‌' ଆପ ସମ୍ପୂର୍ଣ୍ଣ ଭାବେ ସୁରକ୍ଷିତ ଅଟେ । ଏହା କେବଳ OTP ଆଧାରିତ ତଥ୍ୟ ପ୍ରଦାନ କରିଥାଏ । ଏଥିରୁ ତଥ୍ୟ ଲିକ୍‌ ହେବା ରିପୋର୍ଟ ଅତ୍ୟନ୍ତ ଦୁର୍ଭାଗ୍ୟଜନ ଅଟେ । 'କୋୱିନ' ଆପରୁ ସିଧାସଳଖ ଡାଟା ଚୋରି ହୋଇନାହିଁ । ଟେଲିଗ୍ରାମ ଆକାଉଣ୍ଟ ଫୋନ ନମ୍ବର ଦେବା ପରେ ଆପର ଡିଟେଲ ଦେଖାଯାଉଛି । ଏହି ଟେଲିଗ୍ରାମ ବୋଟ ପାଖରେ ଯେଉଁ ତଥ୍ୟ ରହିଛି । ତାହା ପୂର୍ବରୁ ଚୋରି ହୋଇଥିବା ତଥ୍ୟ ଅଟେ । ନ୍ୟାସନାଲ ଡାଟା ଗଭର୍ଣ୍ଣାସ ପଲିସି ଚୂଡ଼ାନ୍ତ । ଯାହା ସମସ୍ତ ସରକାରୀ ବିଭାଗରେ ଡାଟା ଷ୍ଟୋରେଜ, ଆକ୍ସେସ ଓ ସିକ୍ୟୁରିଟି ମାନଙ୍କର ଏକ ନିୟମ ପ୍ରସ୍ତୁତ କରିବ । "