ନୂଆଦିଲ୍ଲୀ:ସଂସଦର ସୁରକ୍ଷା ବିଭ୍ରାଟ ମାମଲାରେ ଗିରଫ ହୋଇଥିବା 6 ଅଭିଯୁକ୍ତଙ୍କ ମଧ୍ୟରୁ 4 ଜଣ ଅଭିଯୁକ୍ତଙ୍କ ରିମାଣ୍ଡ ଅବଧି ବୃଦ୍ଧି କରିଛନ୍ତି କୋର୍ଟ । ଆଜି ସେମାନଙ୍କ ପ୍ରଥମ ପର୍ଯ୍ୟାୟ ରିମାଣ୍ଡ ଅବଧି ଶେଷ ହେବା ପରେ କୋର୍ଟରେ ହାଜର କରାଯାଇଥିଲା । ପୁଣି ଅଧିକ ଜେରାର ଆବଶ୍ଯକତା ଥିବା ଦର୍ଶାଇ ଦିଲ୍ଲୀ ପୋଲିସ ଅଧିକ ଦିନ ରିମାଣ୍ଡ ଅବଧି ଆବେଦନ କରିଥିଲା । କୋର୍ଟ ଏହି 4 ଅଭିଯୁକ୍ତ ମନୋରଞ୍ଜନ ଡି, ସାଗର ଶର୍ମା, ଅମୋଲ ଧନରାଜ ସିନ୍ଦେ ଓ ନୀଲମଙ୍କ ରିମାଣ୍ଡ ଅବଧିକୁ ଆଉ 15 ଦିନ ବଢାଇ ଦେଇଛନ୍ତି । ଏହି ଅଭିଯୁକ୍ତମାନେ ଏବେ ଜାନୁଆରୀ 5 ତାରିଖ ପର୍ଯ୍ୟନ୍ତ ଦିଲ୍ଲୀ ପୋଲିସ ରିମାଣ୍ଡରେ ରହିବେ ।
ଏବେ ସୁଦ୍ଧା ମୁଖ୍ୟ ଅଭିଯୁକ୍ତ ଲଳିତ ଝା ସମେତ ମୋଟ 6 ଅଭିଯୁକ୍ତ ଏହି ମାମଲାରେ ଗିରଫ ହୋଇସାରିଛନ୍ତି । ପଛରେ ଗିରଫ ହୋଇଥିବା ଦୁଇ ଅଭିଯୁକ୍ତଙ୍କ ପୋଲିସ ରିମାଣ୍ଡ ଶେଷ ହୋଇନି । ପ୍ରଥମେ ଗିରଫ ହୋଇଥିବା 4 ଅଭିଯୁକ୍ତଙ୍କ ଆସି 7 ଦିନିଆ ରିମାଣ୍ଡ ଶେଷ ହେବା ପରେ ତାଙ୍କୁ କୋର୍ଟରେ ହାଜର କରାଯାଇଥିଲା । ପୋଲିସ ଏବେ ପର୍ଯ୍ୟନ୍ତ ଜେରାରେ ଏହି ଅଭିଯୁକ୍ତଙ୍କ ଠାରୁ କଣ ତଥ୍ୟ ପ୍ରମାଣ ହାସଲ କରିଛି, ସେନେଇ କିଛି ସ୍ପଷ୍ଟ କରିନି । ମାତ୍ର ଏହା ଏକ ସମ୍ବେଦନଶୀଳ ଘଟଣା ହୋଇଥିବା କାରଣରୁ ମାମଲାରେ ଅଧିକ ଜେରାର ଆବଶ୍ୟକତା ଥିବା ପୋଲିସ ଦର୍ଶାଇଛି । ଆସନ୍ତା 15 ଦିନ ରିମାଣ୍ଡ ମଧ୍ୟରେ ପୋଲିସ ସବୁ କିଛି ସ୍ପଷ୍ଟ କରିବ ଚେଷ୍ଟା କରିବ ।