ନୂଆଦିଲ୍ଲୀ:ସଂସଦରେ ମଣିପୁର ତାତିକୁ ନେଇ କମ୍ପନ । ଆଜି ବି ଗୃହରେ ଆରମ୍ଭରୁ ଅଚଳାବସ୍ଥା ଜାରି ରହିଛି । ମଣିପୁର ହିଂସାକୁ ନେଇ ଗୃହରେ ପ୍ରଧାନମନ୍ତ୍ରୀଙ୍କୁ ବିବୃତ୍ତି ରଖିବାକୁ ଦାବି କରିଥିଲେ ବିରୋଧୀ । ମଣିପୁର ପ୍ରସଙ୍ଗରେ ବିରୋଧ ପ୍ରଦର୍ଶନ ବେଳେ ରାଜ୍ୟସଭାରୁ ଆପ ସାଂସଦ ସଞ୍ଜୟ ସିଂହଙ୍କୁ ସସ୍ପେଣ୍ଡ କରାଯାଇଛି । ସଞ୍ଜୟ ସିଂହଙ୍କୁ ବଳକା କାର୍ଯ୍ୟଦିବସରୁ ସସ୍ପେଣ୍ଡ କରିଛନ୍ତି ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖର ।
ମୌସୁମୀ ଅଧିବେଶନର ଚତୁର୍ଥ ଦିନରେ ବି ଗୃହ ଚଳାଇବା ମୁସ୍କିଲ ହୋଇଥିଲା । ଉଭୟ ସଦନରେ ହଟ୍ଟଗୋଳ ଯୋଗୁଁ ଗୃହକାର୍ଯ୍ୟ ସ୍ବାଭାବିକ ହୋଇପାରୁନାହିଁ । ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖର ଗୃହରେ ଶାନ୍ତି ବଜାୟ ରଖିବାକୁ ବାରମ୍ବାର ଗୁହାରି କରିଥିଲେ ସୁଦ୍ଧା କର୍ଣ୍ଣାପାତ କରିଥିଲେ ବିରୋଧୀ । ଫଳରେ ଅପରାହ୍ନ 2ଟା ଯାଏଁ ରାଜ୍ୟସଭାକୁ ମୁଲତବୀ ଘୋଷଣା ହୋଇଛି । ମଣିପୁର ହିଂସା ପରିସ୍ଥିତି ଓ ବିପର୍ଯ୍ଯସ୍ତ ଆଇନ ଶୃଙ୍ଗଳା ପରିସ୍ଥିତିକୁ ନେଇ ବିରୋଧୀ ହଙ୍ଗାମା କରି ଆସୁଛନ୍ତି । ରାଜ୍ୟସଭାରୁ ଆପ ସାଂସଦ ସଞ୍ଜୟ ସିଂହଙ୍କୁ ସସ୍ପେଣ୍ଡ ପରେ ବିରୋଧୀ ଦଳ ସାଂସଦ ବୈଠକ କରିଛନ୍ତି ।
ରାଜ୍ୟସଭାରୁ ଆପ ସାଂସଦ ସଞ୍ଜୟ ସିଂହଙ୍କୁ ସସ୍ପେଣ୍ଡକୁ ନେଇ ଦିଲ୍ଲୀ ମନ୍ତ୍ରୀ ତଥା ଆପ ନେତା ସୌରଭ ଭାରଦ୍ବାଜ କହିଛନ୍ତି, "ଯଦି ସଞ୍ଜୟ ସିଂହ ସତ୍ୟ ପାଇଁ ସ୍ବର ଉଠାଇ ବହିଷ୍କାର ହୋଇଛନ୍ତି ତେବେ ଆମର କୌଣସି ଦୁଃଖ ନାହିଁ । ଏନେଇ କଣ କରାଯିବ ଦେଖାଯିବ କିନ୍ତୁ ଏହା ଦୁର୍ଭାଗ୍ୟଜନକ ।"