ଅମରାବତି: ଆନ୍ଧ୍ର ପ୍ରଦେଶର ତିରୁପତି ରେଳ ଷ୍ଟେସନ ନିକଟରେ ପଦ୍ମାବତୀ ଏକ୍ସପ୍ରେସର ଗୋଟିଏ ବଗି ଲାଇନଚ୍ୟୁତ ହୋଇଛି । ରେଳବାଇ ପକ୍ଷରୁ ମିଳିଥିବା ସୂଚନା ଅନୁସାରେ, ଟ୍ରେନ୍ଟି ୟାର୍ଡରୁ ଷ୍ଟେସନର 6 ନମ୍ବର ପ୍ଲାଟଫର୍ମକୁ ଯାଉଥିବା ବେଳେ ମାତ୍ର ଗୋଟିଏ ବଗି ଲଇନଚ୍ୟୁତ ହୋଇଛି । ଏଥିରେ କେହି ଯାତ୍ରୀ କିମ୍ବା ରେଳ କର୍ମଚାରୀଙ୍କର କୌଣସି କ୍ଷୟକ୍ଷତି ହୋଇନାହିଁ । ଟ୍ରେନ୍ଟି ପ୍ଲାଟଫର୍ମରେ ଲାଗିବାକୁ ଯାଉଥିବାରୁ କେହି ଯାତ୍ରୀ ଏଥିରେ ବୋର୍ଡ କରିନଥିଲେ । ଟ୍ରେନଟି ତିରୁପତିରୁ ସିକନ୍ଦରାବାଦ ଅଭିମୁଖେ ଯାତ୍ରା ଆରମ୍ଭ କରାଯାଉଥିଲା । ଏହା ନିର୍ଦ୍ଧାରିତ ସମୟର ସାମାନ୍ୟ ବିଳମ୍ବରେ ଯାତ୍ରା ଆରମ୍ଭ କରିବା ନେଇ ରେଳ ବିଭାଗ ସୂଚନା ଦେଇଛି ।
ଖବର ମିଳିବା ପରେ ରେଳବାଇ ବୈଷୟିକ ଟିମ ସହ ଅଧିକାରୀ ଘଟଣାସ୍ଥଳରେ ପହଞ୍ଚିଛନ୍ତି । ଏହି ଲାଇନଚ୍ୟୁତ ବଗିକୁ ପୁଣି ଟ୍ରାକକୁ ଅଣାଯାଉଛି । 7.45 ରେ ଏହି ଟ୍ରେନ ଗନ୍ତବ୍ୟସ୍ଥଳ ଅଭିମୁଖେ ଯାତ୍ରା ଆରମ୍ଭ କରିବ । ଏଥିରେ ଯାତ୍ରୀମାନେ ଭୟଭୀତ ହେବାର କୌଣସି ଆବଶ୍ୟକତା ନଥିବା ମଧ୍ୟ ରେଳବାଇ କହିଛି । ଟ୍ରେନଟି ଲାଇନଚ୍ୟୁତ ହେବା ପରେ ଅନ୍ୟ କିଛି ଟ୍ରେନର ଯାତ୍ରା ସମୟରେ ମଧ୍ଯ ସାମାନ୍ୟ ବିଳମ୍ବ ହୋଇଛି । ତିରୁପତି-ସିକନ୍ଦରାବାଦ ରାୟାଲସୀମା ଏକ୍ସପ୍ରେସ ମଧ୍ୟ ସାମ୍ନାନ୍ୟ ବିଳମ୍ବିତ ହୋଇ ରାତି 8 ଟାରେ ଛାଡିବା ନେଇ ରେଳବାଇ ସୂଚନା ଦେଇଛି ।
ଏହା ମଧ୍ୟ ପଢନ୍ତୁ:-ଚେନ୍ନାଇ-ବେଙ୍ଗାଲୁରୁ ଏକ୍ସପ୍ରେସ ଇଞ୍ଜିନରେ ଧୂଆଁ, ମରାମତି ପରେ ଗଡିଲା ଟ୍ରେନ