ନୂଆଦିଲ୍ଲୀ :ଆଜିି ଠାରୁ ସାରା ଦେଶରେ ଆରମ୍ଭ ହୋଇଛି 15 ରୁ 18 ବର୍ଷ ବୟସ୍କ ଛାତ୍ରଛାତ୍ରୀଙ୍କ ପାଇଁ ଟୀକାକରଣ । ତେବେ ଏହି ଟୀକାକରଣ ଡ୍ରାଇଭର ପ୍ରଥମ ଦିନରେ ୪୦ ଲକ୍ଷ ଛାତ୍ରଛାତ୍ରୀ ଟୀକାକରଣରେ ସାମିଲ ହୋଇଥିବା CoWIN ପୋର୍ଟାଲ ରେକର୍ଡରୁ ସୂଚନା ମିଳିଛି ।
ଆଜି (ସୋମବାର) ରାତି 8.30 ପର୍ଯ୍ୟନ୍ତ ଦେଶବ୍ୟାପୀ ଟୀକାକରଣ ଜାରି ରହିଥିବା ବେଳେ ଏଥିରେ ରେକର୍ଡ ସଂଖ୍ୟକ ୪୦ ଲକ୍ଷ ହିତାଧିକାରୀ ଟିକା ଗ୍ରହଣ କରିଛନ୍ତି । ଭାରତରେ ଚାଲିଥିବା ଦେଶବ୍ୟାପୀ ଟୀକାକରଣ ଡ୍ରାଇଭରେ ଏହି ସଫଳତାକୁ ପ୍ରଶଂସା କରିବା ସହ ୟଙ୍ଗ ଇଣ୍ଡିଆକୁ ଧନ୍ୟବାଦ ଜଣାଇଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭ୍ୟ ।
ଭାରତରେ ବୟସ୍କଙ୍କ ଟୀକାକରଣ ପ୍ରାୟ ଜନସଂଖ୍ୟାକୁ ସମ୍ପୂର୍ଣ୍ଣ କରିବାକୁ ବସିଥିବା ବେଳେ ଏବେ ଚଳିତ ମାସ ଆରମ୍ଭରୁ ଆରମ୍ଭ ହୋଇଛି ୧୫ ରୁ ୧୮ ବର୍ଷୀୟଙ୍କ ପାଇଁ ଟୀକାକରଣ ଅଭିଯାନ । ଏହି ଟୀକାକରଣ ଡ୍ରାଇଭ ପାଇଁ ପଞ୍ଜିକରଣ ଜାନୁଆରୀ 1 ରୁ ଆରମ୍ଭ ହୋଇଥିବାବେଳେ ଜାନୁଆରୀ 3 (ଆଜି) ରେ ଡ୍ରାଇଭ ଆରମ୍ଭ ହୋଇଥିଲା । ସ୍ୱାସ୍ଥ୍ୟକେନ୍ଦ୍ର ଏବଂ ବିଦ୍ୟାଳୟ ଗୁଡ଼ିକର ପରାମର୍ଶ କ୍ରମେ ଏହି ଟୀକାକରଣ କରାଯାଉଛି । ଏହାପୂର୍ବରୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଦିଲ୍ଲୀ ସ୍ଥିତ ରାମ ମନୋହର ଲୋହିଆ ହସ୍ପିଟାଲରେ ପହଞ୍ଚି ଟୀକାକରଣ ସ୍ଥାନ ପରିଦର୍ଶନ କରିବା ସହ ସ୍ଥିତି ସମୀକ୍ଷା କରିଥିଲେ ।
ତେବେ ଛାତ୍ରଛାତ୍ରୀଙ୍କ ପାଇଁ ଟୀକାକରଣ ନେଇ ଆରମ୍ଭ ହୋଇଥିବା ଡ୍ରାଇଭର ପ୍ରଥମ ଦିନରେ ବେଶ ଉତ୍ସାହ ପରିଲିକ୍ଷିତ ହୋଇଛି । ପ୍ରଥମ ଦିନରେ ମୋଟ ୪୦ ଲକ୍ଷ ଛାତ୍ରଛାତ୍ରୀଙ୍କ ଟୀକାକରଣ ଏହି ପ୍ରକ୍ରିୟାକୁ କ୍ରିୟାଶୀଳ କରିବା ସହ ନିର୍ଦ୍ଧାରିତ ସମୟରେ ସଫଳତାର ସହ ଏହି ଅଭିଯାନକୁ ମଧ୍ୟ ଶେଷ କରିବ ବୋଲି ଆଶା କରାଯାଉଛି ।
ANI