ପାଟନା: ନୀତିଶ କୁମାରଙ୍କୁ କଂଗ୍ରେସ ଝଟକା । ଭିତ୍ତିଭୂମି ପୂର୍ବରୁ ବିଫଳ ହେଲା ରଣନୀତି । ଟଳିଲା ପ୍ରସ୍ତାବିତ ଜୁନ 12 ମହାବୈଠକ । ବୈଠକ ପାଇଁ ଅଣ୍ଟା ଭିଡିଥିବା ନୀତିଶ କୁମାର ନିଜେ ହିଁ ବୈଠକକୁ ସ୍ଥଗିତ ନେଇ ଘୋଷଣା କରିଛନ୍ତି । ଯାହାକୁ ନେଇ ଏବେ ରାଜନୀତିରେ ମହଲରେ ଜୋରଦାର ଚର୍ଚ୍ଚା ।
ଭାରତୀୟ ଜନତା ପାର୍ଟି(ବିଜେପି) ବିରୋଧରେ ମହାମେଣ୍ଟ ତଥା ତୃତୀୟ ସାମ୍ମୁଖ୍ୟ ଗଠନ ପାଇଁ ଉଦ୍ୟମ ଚଳାଇଛନ୍ତି ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଏଥିପାଇଁ ଦେଶର ବିଭିନ୍ନ ବିଜେପି ବିରୋଧୀ ରାଜନୈତିକ ଦଳର ନେତା ଓ ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିଥିଲେ । ଏହାସହ ଜୁନ 12 ରେ ପାଟନାରେ ପ୍ରସ୍ତାବିତ ବୈଠକରେ ସାମିଲ ହେବାକୁ ନିମନ୍ତ୍ରଣ ଦେଇଥିଲେ ।
ବୈଠକର ଉଦ୍ଦେଶ୍ୟ ଥିଲା 2024 ସାଧାରଣ ନିର୍ବାଚନରେ ବିଜେପି ବିରୋଧରେ ମିଳିତ ଲଢେଇ କରିବା । ସାରା ଦେଶରେ କିଭଳି ବିଜେପିର ବିଜୟ ରଥ ଅଟକାଇ ହେବ, କଣ ରଣନୀତି କଲେ ଆଗାମୀ ସାଧାରଣ ନିର୍ବାଚନରେ ବିଜେପିକୁ ପରାସ୍ତ କରିହେବ ସେନେଇ ପ୍ରାରମ୍ଭିକ ଆଲୋଚନା ହୋଇଥାନ୍ତା । ଏଥିପାଇଁ ଦେଶର ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ଓ ରାଜନୈତିକ ନେତା ମାନଙ୍କୁ ନୀତିଶ ନିମନ୍ତ୍ରଣ ଦେଇଥିଲେ । ସମସ୍ତ ନେତା ମଧ୍ୟ ପାଟନାରେ ପ୍ରସ୍ତାବିତ ବୈଠକରେ ସାମିଲ ହେବାକୁ ସହମତି ଦେଇଥିଲେ । କିନ୍ତୁ ଶେଷ ମୁହୂର୍ତ୍ତରେ କଂଗ୍ରେସ ହିଁ ବୈଠକରେ ସାମିଲ ହେବାକୁ ମନା କରିଦେଇଛି ।
ଏନେଇ ଆଜି (ସୋମବାର) ସୂଚନା ଦେଇ ବିହାର ମୁଖ୍ୟମନ୍ତ୍ରୀ ନୀତିଶ କୁମାର କହିଛନ୍ତି, ‘‘ 12 ଜୁନରେ ପ୍ରସ୍ତାବିତ ବିରୋଧୀ ଦଳ ବୈଠକକୁ କଂଗ୍ରେସ ନେତୃତ୍ବ ପାଇଁ ବାତିଲ କରାଯାଇଛି । ବୈଠକରେ କଂଗ୍ରେସର ଉପସ୍ଥିତି ଜରୁରୀ ଥିଲା । କଂଗ୍ରେସ ବ୍ୟତୀତ ସମସ୍ତ ଦଳ ବୈଠକରେ ସାମିଲ ହେବାକୁ ପ୍ରସ୍ତୁତ ଥିଲେ । ପୁଣି ଥରେ କଂଗ୍ରେସ ନେତୃତ୍ବ ସହିତ ଆଲୋଚନା କରି ଆମେ ନୂଆ ତାରିଖ ଘୋଷଣା କରିବୁ । କିନ୍ତୁ ବର୍ତ୍ତମାନ 12 ଜୁନରେ ପ୍ରସ୍ତାବିତ ବୈଠକକୁ ସ୍ଥଗିତ ରଖାଯାଇଛି ।’’
କିନ୍ତୁ ବୈଠକକୁ ନେଇ କଂଗ୍ରେସ ସୂତ୍ରରୁ ମିଳିଥିବା ସୂଚନା ଅନୁସାରେ ନୀତିଶଙ୍କ ଏହି ବୈଠକରେ କଂଗ୍ରେସ ସିଧାସଳଖ ସାମିଲ ହେବାକୁ ପ୍ରସ୍ତୁତ ନାହିଁ । କାରଣ କଂଗ୍ରେସ ଦିଲ୍ଲୀ, ପଞ୍ଜାବରେ ଆମ ଆଦମୀ ପାର୍ଟି, ୟୁପିରେ ସମାଜବାଦୀ ପାର୍ଟି, ପଶ୍ଚିମବଙ୍ଗରେ ଟିଏମସି, ତେଲେଙ୍ଗାନାରେ ବିଆରଏସ ସହ ସିଧା ସଳଖ ଲଢେଇ କରୁଛି । ଯେଉଁଥି ପାଇଁ ସମ୍ପୃକ୍ତ ଦଳ ଗୁଡିକ ସହ କଂଗ୍ରେସ ନେତୃତ୍ବ ସିଧା ସଳଖ ବୈଠକ କରିବାକୁ ପ୍ରସ୍ତୁତ ନୁହଁନ୍ତି । ଏପରି ସ୍ଥିତିରେ ନୀତିଶ କୁମାର ଅନ୍ୟ ବିକଳ୍ପ ଉପରେ ବର୍ତ୍ତମାନ ବିଚାର କରୁଛନ୍ତି ।
