ଶିମଲା:ଶିମଲାରେ 18 ତାରିଖରେ ହୋଇଥିବା ବିସ୍ଫୋରଣ ସ୍ଥଳରେ ପହଞ୍ଚି ତଦନ୍ତ ଆରମ୍ଭ କଲା NSG ଟିମ୍ । 18 ତାରିଖରେ ଶିମଲା ସହରର କେନ୍ଦ୍ରସ୍ଥଳରେ ଥିବା ହିମାଚଳାଇ ରସୋଇ ରେସ୍ତୋରାଁ ନିକଟରେ ଏହି ବିସ୍ଫୋରଣ ଘଟିଥିଲା । ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ 13 ଜଣ ଆହତ ହୋଇଥିଲେ । ପ୍ରଥମେ ଏହା ଏକ ସିଲିଣ୍ଡର ବିସ୍ଫୋରଣ ହୋଇଥିବା ନେଇ ସନ୍ଦେହ କରାଯାଉଥିବା ବେଳେ ଏ ସମ୍ପର୍କରେ ପ୍ରାଥମିକ ତଦନ୍ତରେ ସେପରି କିଛି ନମିଳିବା ପରେ ସନ୍ଦେହ ଆତଙ୍କୀ ଲିଙ୍କ୍ ଆଡକୁ ଯାଇଥିଲା । ଏହାପରେ ଏହାର ତଦନ୍ତ ଆତଙ୍କୀ ଲିଙ୍କ୍ ଦିଗ ସହ ଆରମ୍ଭ ହୋଇଥିଲା । ଆଜି ଜାତୀୟ ସୁରକ୍ଷା ଗାର୍ଡ (ଏନଏସଜି) ଅଧିକାରୀଙ୍କ ସହ କମାଣ୍ଡୋଙ୍କ ଏକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସମଗ୍ର ଅଞ୍ଚଳକୁ କର୍ଡନ କରି ଡଗ୍ ସ୍କ୍ବାଡ୍ ସାହାଯ୍ୟରେ ଅନୁସନ୍ଧାନ କରାଯାଉଛି । ସହ ବିସ୍ଫୋରଣ ସ୍ଥଳରୁ ବିଭିନ୍ନ ନମୂନା ସଂଗ୍ରହ କରାଯାଇ ଫୋରେନସିକ ଲ୍ୟାବ୍କୁ ପଠାଯାଇଛି ।
18 ତାରିଖରେ ଘଟିଥିବା ଏହି ବିସ୍ଫୋରଣରେ ଉକ୍ତ ରେସ୍ତାରାଁ ସହ ପ୍ରାୟ 12ଟି ଦୋକାନ କ୍ଷତିଗ୍ରସ୍ତ ହୋଇଥିଲା । ଜଣଙ୍କ ମୃତ୍ୟୁ ହେବା ସହ 12 ଜଣ ଆହତ ହୋଇଥିଲେ । ପ୍ରାୟ 5 ଶହ ମିଟର ପର୍ଯ୍ୟନ୍ତ ଏହି ବିସ୍ଫୋରଣର କମ୍ପନ ଅନୁଭୂତ ହୋଇଥିଲା । ପ୍ରାଥମିକ ଭାବେ ଶିମଲା ପୋଲିସ ଅଧୀକ୍ଷକଙ୍କ ନେତୃତ୍ବରେ ଏକ ସ୍ବତନ୍ତ୍ର ଅନୁସନ୍ଧାନକାରୀ ଟିମ୍ (SIT) ଗଠନ କରାଯାଇ ତଦନ୍ତ ଆରମ୍ଭ କରାଯାଇଥିଲା । ଭାରତୀୟ ଦଣ୍ଡ ସଂହିତାର ଧାରା 336, 337 ଓ 304-Aରେ ଏକ ମାମଲା ରୁଜୁ କରାଯାଇଛି । ହେଲେ ଏବେ ଏନଏସ୍ଜି ଏହାର ତଦନ୍ତ ଆରମ୍ଭ କରିଛି ।