ନୂଆଦିଲ୍ଲୀ: ଦିଲ୍ଲୀ ପୋଲିସ ଏନକାଉଣ୍ଟରେ କୁଖ୍ୟାତ ଅପରାଧୀ କୁଳଦୀପର ମୃତ୍ୟୁ । ଶନିବାର ବିଳମ୍ବିତ ରାତିରେ କୁଖ୍ୟାତ ଅପରାଧି କୁଲଦୀପ ମନର ଫାଜ୍ଜାର ଦିଲ୍ଲୀ ପୋଲିସ ଏନକାଉଣ୍ଟରରେ ମୃତ୍ୟୁ ହୋଇଛି ।
ଶୁକ୍ରବାର କୁଳଦୀପ ଫାଜ୍ଜା ଗୁରୁ ତେଗ ବାହାଦୁର ଡାକ୍ତରଖାନାରୁ ଚମ୍ପଟ ମାରିଥିଲା । ଫେରାର ପରେ ସେ ରୋହିଣୀ ସେକ୍ଟର 14ରେ ଥିବା ତୁଳସୀ ଆପାର୍ଟମେଣ୍ଟରେ ଲୁଚି ରହିଥିଲା । ପୋଲିସ ରୋହିଣୀ ସେକ୍ଟରରୁ ତାକୁ ଖୋଜି ପାଇଥିଲା । ଏହା ପରେ ଦିଲ୍ଲୀର ସ୍ବତନ୍ତ୍ର ପୋଲିସ କୁଳଦୀପ ଉପରେ ଗୁଳି ଚଲାଇଥିଲା ।
ପୋଲିସ ଗୁଳିରେ କୁଳଦୀପ ଆହତ ହୋଇଥିଲା । ତାକୁ ଆହତ ଅବସ୍ଥାରେ ଆମ୍ବେଦକର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ । ଏହା ସହିତ ଅପରାଧି ଗ୍ୟାଙ୍ଗର ଅନ୍ୟ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଆହତ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି ।
କୁଲଦୀପ ଗତ ବର୍ଷ ସ୍ବତନ୍ତ୍ର ପୋଲିସ ଦ୍ବାରା ଗିରଫ ହୋଇଥିଲା । କୁଲଦୀପ ନାଁରେ ହତ୍ୟା, ହତ୍ୟା ଉଦ୍ୟମ ଓ ଡକାୟତି ଭଳି 70ଟି ମାମଲା ରହିଥିଲା । ଗୁରୁବାର ପୋଲିସ ତାକୁ ଡାକ୍ତରଖାନା ନେଉଥିବା ସମୟରେ ତାର ସହଯୋଗୀମାନେ ପୋଲିସ ଉପରେ ଆକ୍ରମଣ କରିବା ସମୟରେ କୁଲଦୀପ ଖସି ପଳାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ