ନୂଆଦିଲ୍ଲୀ:ପୂର୍ବତନ କ୍ରିକେଟର ତଥା କଂଗ୍ରେସ ନେତା ନବଜୋତ ସିଂ ସିଦ୍ଧୁଙ୍କ ପତ୍ନୀ କ୍ୟାନ୍ସରରେ ପୀଡିତ ଅଛନ୍ତି । ପତ୍ନୀ ନବଜୋତ କୌର ସିଦ୍ଧୁଙ୍କ କ୍ୟାନ୍ସର ଏବେ ଷ୍ଟେଜ-୨ରେ ଅଛି । ତାଙ୍କର ଅସ୍ତ୍ରୋପଚାର ହେବାକୁ ଯାଉଛି । ଏନେଇ ସେ ନିଜେ ଟ୍ବିଟ୍ କରି ଜଣାଇଛନ୍ତି । ତାଙ୍କର ଏଭଳି ରୋଗ ସମୟରେ ସ୍ବାମୀ ଜେଲରେ ଥିବାରୁ ସେ ଅତ୍ୟନ୍ତ ଭାବବିହ୍ବଳ ହୋଇ ସିଦ୍ଧୁଙ୍କ ଉଦ୍ଦେଶ୍ୟରେ ବାର୍ତ୍ତା ଲେଖିଛନ୍ତି । ନବଜୋତ କୌର ଲେଖିଛନ୍ତି, ''ସେ(ନବଜୋତ ସିଂ ସିଦ୍ଧୁ) ଯେଉଁ ଅପରାଧ ପାଇଁ ଜେଲ୍ ଅଛନ୍ତି ତାହା ସେ କରିନାହାନ୍ତି । ଯେଉଁମାନେ ଏଥିରେ ସମ୍ପୃକ୍ତ ଅଛନ୍ତି ସମସ୍ତଙ୍କୁ କ୍ଷମା କରିଦିଅ । ବାହାରେ ରହି ପ୍ରତିଦିନ ତୁମଠାରୁ ଅଧିକ ତୁମକୁ ମୁଁ ଅପେକ୍ଷା କରିଛି । ସବୁଥର ଭଳି ତୁମର ଯନ୍ତ୍ରଣା ନେଇଯିବାକୁ ଚେଷ୍ଟା କରୁଛି ।''
ଆହୁରି ମଧ୍ୟ ସେ ଲେଖିଛନ୍ତି ଯେ, ତୁମ ଅପେକ୍ଷାରେ ଅଛି । ତୁମେ ବାରମ୍ବାର ନ୍ୟାୟ ପାଇବାରୁ ବଞ୍ଚିତ ହେଉଥିବା ମୁଁ ଦେଖୁଛି । ସତ୍ୟ ବହୁତ ଶକ୍ତିଶାଳୀ । କିନ୍ତୁ ଏହା ତୁମର ବାରମ୍ବାର ପରୀକ୍ଷା ନେଉଛି । ଏଇଟା କଳିଯୁଗ । କ୍ଷମା କରିଦେବ ତୁମକୁ ଅପେକ୍ଷା କରିପାରିବିନି କାରଣ ବର୍ତ୍ତମାନ ମୋ କ୍ୟାନ୍ସର ଷ୍ଟେଜ-୨ରେ ଅଛି । ଆଜି ମୁଁ ଅସ୍ତ୍ରୋପଚାର ପାଇଁ ଯାଉଛି । ଏଥିପାଇଁ ମୁଁ କାହାରିକୁ ଦୋଷ ଦେବିନି । ଏସବୁ ଭଗବାନଙ୍କ ଇଚ୍ଛା ।