ନୂଆଦିଲ୍ଲୀ:140 କୋଟି ଭାରତୀୟଙ୍କ ଚନ୍ଦ୍ରକୁ ଛୁଇଁବାର ସ୍ବପ୍ନ ଆଜି ସତ ହୋଇଛି । ମହାକାଶ ଗବେଷଣାରେ ଇତିହାସ ସୃଷ୍ଟି କରିଛି ଭାରତ । ବିଶ୍ବର ପ୍ରଥମ ଦେଶ ଭାବେ ଚନ୍ଦ୍ରର ଦକ୍ଷିଣ ମେରୁରେ ଅବତରଣ କରିଛି ଭାରତ । ଐତିହାସିକ ସଫଳତା ପରେ ସାରା ଦେଶରେ ଆରମ୍ଭ ହୋଇଛି ଉତ୍ସବ ପାଳନ । ରାଷ୍ଟ୍ରପତି ଦ୍ରୌପଦୀ ମୁର୍ମୁ ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)ର ସମସ୍ତ ବୈଜ୍ଞାନିକଙ୍କୁ ଶୁଭେଚ୍ଛା ଜଣାଇଛନ୍ତି । ଏହି ମହତ୍ବପୂର୍ଣ୍ଣ ଅବସର ସମଗ୍ର ଦେଶକୁ ଗର୍ବିତ କରିଛି ବୋଲି ରାଷ୍ଟ୍ରପତି କହିଛନ୍ତି ।
ଲ୍ୟାଣ୍ଡିଂର ସିଧାପ୍ରସାରଣ ଦେଖିବା ପରେ ରାଷ୍ଟ୍ରପତି ଏକ ଭିଡିଓ ବାର୍ତ୍ତାରେ ଶୁଭେଚ୍ଛା ଜଣାଇଛନ୍ତି । ରାଷ୍ଟ୍ରପତି କହିଛନ୍ତି,‘‘ ଚନ୍ଦ୍ରଯାନ-3 କୁ ଚନ୍ଦ୍ରପୃଷ୍ଠରେ ସଫଳ ଅବତରଣ କରାଇ ବୈଜ୍ଞାନିକମାନେ ଇତିହାସ ସୃଷ୍ଟି କରିଛନ୍ତି । ISROକୁ ଅଭିନନ୍ଦନ ଜଣାଉଛି । ଚନ୍ଦ୍ରଯାନ ମିଶନ ସହ ଜଡିତ ଥିବା ସମସ୍ତଙ୍କୁ ଶୁଭେଚ୍ଛା ଏବଂ ସେମାନଙ୍କୁ ଆହୁରି ବଡ଼ ସଫଳତା ହାସଲ କରନ୍ତୁ ଏହା ହିଁ କାମନା କରୁଛି ।’’
ଲ୍ୟାଣ୍ଡିଂ ପ୍ରକ୍ରିୟା ଜାରି ରହିଥିବା ବେଳେ ବ୍ରିକ୍ସ ସମ୍ମିଳନୀରେ ଅଂଶଗ୍ରହଣ କରିବା ପାଇଁ ଦକ୍ଷିଣ ଆଫ୍ରିକା ଗସ୍ତରେ ଥିବା ପ୍ରଧାନମନ୍ତ୍ରୀ ଇସ୍ରୋ ମିଶନ କଣ୍ଟ୍ରୋଲ ସହ ଯୋଡି ହୋଇଥଲେ । ଲ୍ୟାଣ୍ଡିଂର ଲାଇଭ୍ ଟେଲିକାଷ୍ଟ ଦେଖିଥିଲେ । ଲ୍ୟାଣ୍ଡିଂ ସଫଳ ହେବା ପରେ ପ୍ରଧାନମନ୍ତ୍ରୀ ଭର୍ଚ୍ଚୁଆଲି ଦେଶକୁ ସମ୍ବୋଧିତ କରିବା ସହ ଭାରତୀୟ ମହାକାଶ ବିଜ୍ଞାନୀଙ୍କୁ ଶୁଭେଚ୍ଛା ଜଣାଇଥିଲେ ।