ପାଟନା:ବିହାରର ଗୟାରେ ଲଜ୍ଜା । 10 ବର୍ଷୀୟା ନାବାଳିକାଙ୍କୁ ଗଣଦୁଷ୍କର୍ମ କଲେ ତିନି ନାବାଳକ । ଥାନାରେ ଅଭିଯୋଗ ପରେ ତିନି ନାବାଳକଙ୍କୁ ଥାନାରେ ଅଟକ ରଖିଲା ପୋଲିସ । ଗତ ଶୁକ୍ରବାର ଦିନ ବୋଦ୍ଧ ଗୟା ପୋଲିସ ଷ୍ଟେସନ ଅଞ୍ଚଳରେ ଏହି ଲଜ୍ଜାଜନକ ଘଟଣା ଘଟିଥିବା ସୂଚନା ମିଳିଛି । ନାବାଳିକା ଜଣକ ରାସ୍ତାରେ ଯାଉଥିବା ବେଳେ ତିନି ନାବାଳକ ତାଙ୍କୁ ଟେକି ନେଇ ଗଣଦୁଷ୍କର୍ମ କରି ଘଟଣାସ୍ଥଳରୁ ଚମ୍ପଟ ମାରିଥିଲେ । ଏନେଇ ପୀଡିତା ଘରେ ପହଞ୍ଚି ପରିବାର ଲୋକଙ୍କୁ ଜଣାଇବା ପରେ ଥାନାରେ ଅଭିଯୋଗ ହୋଇଛି ।
ଥାନାରେ ଅଭିଯୋଗ କଲେ ପୀଡିତାଙ୍କ ବାପା:ପରିବାର ଲୋକେ ଝିଅ ଗଣଦୁଷ୍କର୍ମର ଶିକାର ହୋଇଥିବା ଜାଣିବା ପରେ ବୋଦ୍ଧ ଗୟା ପୋଲିସ ଷ୍ଟେସନ ଓ ମହିଳା ଥାନାରେ ଅଭିଯୋଗ କରିଥିଲେ । ଏନେଇ ପୋଲିସ ଏକ ମାମାଲା ରୁଜୁ କରି ତଦନ୍ତ ଆରମ୍ଭ କରିଥିଲା । ତେବେ ଦୁଷ୍କର୍ମ କରିଥିବା ସମସ୍ତ ନାବାଳକଙ୍କ ବୟସ 12ରୁ 13 ବର୍ଷ ହେବ ବୋଲି ଜଣାପଡିଛି । ଏକ ସ୍ବତନ୍ତ୍ର ପୋଲିସ ଟିମ ବିଭିନ୍ନ ସ୍ଥାନରେ ଚଢାଉ କରି ଅଭିଯୁକ୍ତ ନାବାଳକମାନଙ୍କୁ ଧରିବାରେ ସଫଳ ହୋଇଛି ।
ଖୁବଶୀଘ୍ର ଅଭିଯୁକ୍ତଙ୍କୁ ଦିଆଯିବ ଦଣ୍ଡ: ଏହି ମାମଲାରେ ସ୍ୱତନ୍ତ୍ର ପୋଲିସ ଟିମ୍ ତିନି ନାବାଳକ ଅଭିଯୁକ୍ତଙ୍କୁ ଅଟକ ରଖିଛି । ମହିଳା ଥାନାକୁ ଏନେଇ ସୂଚନା ଦିଆଯାଇଥିବା ବେଳେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଖୁବଶୀଘ୍ର କୋର୍ଟରେ ଏହି ମାମଲାର ବିଚାର କରାଯାଇ ଅଭିଯୁକ୍ତଙ୍କୁ ଦଣ୍ଡ ଦିଆଯିବ ବୋଲି କୁହାଯାଇଛି ।