ଲକ୍ଷ୍ନୌ: ଉତ୍ତରପ୍ରଦେଶର ମଥୁରା ପକ୍ସୋ କୋର୍ଟ ସୋମବାର ଐତିହାସିକ ରାୟ ଶୁଣାଇଛନ୍ତି । ମାମଲା ଶୁଣାଣି ଆରମ୍ଭର ମାତ୍ର 15 ଦିନରେ (ଟ୍ରାଏଲ ଆରମ୍ଭର 15ଟି କୋର୍ଟ କାର୍ଯ୍ୟ ଦିବସ ) ଦୋଷୀକୁ ଫାଶୀ ଦଣ୍ଡ ଶୁଣାଇ ଇତିହାସ ରଚିଛନ୍ତି । ମାମଲାକୁ ନେଇ ପୋଲିସର ତତ୍ପରତା ଓ ସମସ୍ତ ତଥ୍ୟ ପ୍ରମାଣକୁ ଆଧାର କରି ଅଭିଯୁକ୍ତ ଜଣକ ଦୋଷୀ ସାବ୍ୟସ୍ତ ହୋଇଥିଲା। ଏଣୁ ଘଟଣାକୁ 15 ଦିନ ବିତିଥିଲେ ସୁଦ୍ଧା ଅଭିଯୁକ୍ତ ବିରୋଧରେ ସମସ୍ତ ପ୍ରମାଣ ଥିବାରୁ କୋର୍ଟ ଏହି ରାୟ ଶୁଣାଇଛନ୍ତି । ତେବେ ଦୋଷୀ ଜଣକ 9ବର୍ଷର ନାବାଳିକାର ତଣ୍ଟି ଚିପି ହତ୍ୟା କରିଥିଲା ।
8 ଏପ୍ରିଲରୁ ନିଖୋଜ ଥିଲା ଶିଶୁ:- ସଦର ବଜାର ପୋଲିସ ଷ୍ଟେସନର ଅରଙ୍ଗାବାଦ ଅଞ୍ଚଳର ଜଣେ 9ବର୍ଷର ନାବାଳିକା ଗତ ଏପ୍ରିଲ 8ରୁ ଘରୁ ନିଖୋଜ ହୋଇଯାଇଥିଲା । ଶିଶୁର ପିତା ଏପ୍ରିଲ 9ରେ ସଦର ବଜାର ପୋଲିସ ଷ୍ଟେସନରେ ଏକ ନିଖୋଜ ମାମଲା ଦାଏର କରିଥିଲେ ଏବଂ ସୈଫ ନାମକ ଜଣେ ବ୍ୟକ୍ତିଙ୍କୁ ଅପହରଣ କରିଥିବା ନେଇ ସନ୍ଦେହ ପ୍ରକାଶ କରିଥିଲେ। ଏହା ପରେ ନାବାଳିକାକୁ ଖୋଜିବା ପାଇଁ ପୋଲିସ ଉକ୍ତ ଉକ୍ତ ଅଞ୍ଚଳର ସିସିଟିଭି କ୍ୟାମେରା ଯାଞ୍ଚ କରିଥିଲା । ଏହା ସହିତ ଏକ ସ୍ବତନ୍ତ୍ର ଦଳ ଗଠନ କରିବା ପରେ ଅଭିଯୁକ୍ତକୁ ଖୋଜିବା ଆରମ୍ଭ କରାଯାଇଥିଲା । ସେପଟେ ପୋଲିସ ଔରଙ୍ଗାବାଦ ଅଞ୍ଚଳରେ ଥିବା ସୈଫକୁ ପଚରାଉଚରା ଆରମ୍ଭ କରାଯାଇଥିଲା । ପଚରା ଉଚରା ସମୟରେ ପୋଲିସକୁ ସବୁ ସତ କହିଥିଲା ସୈଫ। ଏହାପରେ ନାବାଳିକାର ମୃତଦେହକୁ ଔରଙ୍ଗାବାଦ ଅଞ୍ଚଳରୁ ଉଦ୍ଧାର କରାଯାଇଥିଲା ।