ରାୟପୁର:ଅନ୍ୟମନସ୍କ ଭାବେ ରେଳ ଧାରଣା ବସି କାନରେ ଇୟରଫୋନ ଲଗାଇ ଅନଲାଇନ ଗେମ ଖେଳିବା ଜଣେ ଯୁବକଙ୍କ ପାଇଁ କାଳ ହୋଇଛି । ଟ୍ରେନ ଧକ୍କାରେ ପ୍ରାଣ ହରାଇଛନ୍ତି ସମ୍ପୃକ୍ତ ଯୁବକ (Man wearing earphones hit by train in Balod)। ଏପରି ଅଘଟଣା ଦେଖିବାକୁ ମିଳିଛି ଛତିଶଗଡ ବାଲୋଦ ଜିଲ୍ଲାରେ । ମିଳିଥିବା ସୂଚନା ଅନୁସାରେ ମୃତ ଯୁବକଙ୍କ ଅନଲାଇନ ଗେମ ଖେଳିବାର ନିଶା ଥିଲା । ରେଳ ଧାରଣାରେ ବସି ଗେମ ଖେଳୁଥିଲା ବେଳେ ଦୃତଗାମୀ ଟ୍ରେନ ମାଡିଯିବା ଫଳରେ ଯୁବକଙ୍କ ମୃତ୍ୟୁ ହୋଇଛି ।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ମୃତକଙ୍କ ନାମ ଯୋଗେନ୍ଦ୍ର ଯୋଶୀ ଓ ଦ୍ବାଦଶର ଛାତ୍ର । ପରିବାର ଲୋକେ ପୋଲିସକୁ ଦେଇଥିବା ସୂଚନା ଅନୁସାରେ, ସକାଳେ ସେ ଶୌଚ ହେବା ପାଇଁ ରେଳ ଧାରଣା ନିକଟବର୍ତ୍ତୀ ସ୍ଥାନକୁ ଯାଇଥିଲା । ସେଠାରେ ସେ କାନରେ ଇୟର ଫୋନ ଲଗାଇ ରେଳ ଧାରଣାରେ ବସି ଗେମ ଖେଳୁଥିଲା ବେଳେ ଏହି ଅଘଟଣ ଘଟିଛି । ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ମୃତଦେହ ଦେଖିବା ପରେ ସ୍ଥାନୀୟ ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ନିକଟସ୍ଥ ହସ୍ପିଟାଲକୁ ପଠାଇଛି ।