ଭୋପାଳ: ପ୍ରଧାନମନ୍ତ୍ରୀ ମୋଦିଙ୍କ ପ୍ରଶଂସା କରୁକରୁ ପୂର୍ବତନ ପ୍ରଧାନମନ୍ତ୍ରୀଙ୍କୁ ନେଇ ବିବାଦୀୟ ବୟାନ ଦେଲେ ମଧ୍ୟପ୍ରଦେଶର ଜଙ୍ଗଲ ସୁରକ୍ଷା ମନ୍ତ୍ରୀ ବିଜୟ ଶାହ । ଗତ ଶୁକ୍ରବାର ଏକ ସଭାକୁ ସମ୍ବୋଧିତ କରିବା ସମୟରେ ଏହି ବିବାଦୀୟ ବୟାନ ଦେଇଛନ୍ତି ମନ୍ତ୍ରୀ । ଏକ ସଭାରେ ଆୟୁଷ୍ମାନ ଯୋଜନାକୁ ନେଇ ଉପସ୍ଥିତ ଜନତାଙ୍କ ବୁଝାଇଥିଲେ । ଏହି ସମୟରେ ସେ ଏକ ବିବାଦୀୟ ବୟାନ ଦେଇଥିଲେ । ଯାହା ଏବେ ଖୁବ୍ ଭାଇରାଲ୍ ହେବାରେ ଲାଗିଥିବା ବେଳେ ମନ୍ତ୍ରୀ ଟାର୍ଗେଟ୍ ହେବାରେ ଲାଗିଛନ୍ତି ।
ମଧ୍ୟପ୍ରଦେଶର ଉମେରିଆ ଅଞ୍ଚଳ ଧମେଖରରେ ଆୟୋଜିତ ଏକ ଜନସେବା ଅଭିଯାନ କାର୍ଯ୍ୟକ୍ରମରେ ଯୋଗ ଦେବାକୁ ପହଞ୍ଚିଥିଲେ ମନ୍ତ୍ରୀ ବିଜୟ ଶାହ । ଏହି କାର୍ଯ୍ୟକ୍ରମରେ ଉପସ୍ଥିତ ଜନତାଙ୍କୁ ସମ୍ବୋଧିତ କରି ବିଜୟ ଶାହ କହିଥିଲେ, "ସ୍ବାଧୀନତାର ୭୫ ବର୍ଷ ବିତି ଗଲାଣି । କିନ୍ତୁ ଆଜି ପର୍ଯ୍ୟନ୍ତ କୌଣସି ପ୍ରଧାନମନ୍ତ୍ରୀ ଦେଶରୁ ଗରିବଙ୍କ ବିଷୟରେ ଚିନ୍ତା କରିନଥିଲେ । ପ୍ରଥମ ଥର ପାଇଁ ସେମାନଙ୍କ ବିଷୟରେ କେହି ଜଣେ ଯଦି ଚିନ୍ତା କରିଛନ୍ତି ସେ ହେଉଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପୂର୍ବରୁ ଗଧ, ଘୋଡ଼ା, ହାତୀଛାପ ପ୍ରଧାନମନ୍ତ୍ରୀ ଦେଶକୁ ଚଳାଉଥିଲେ ।"