ରାଷ୍ଟ୍ରପତିଙ୍କୁ ଭେଟିଲା କଂଗ୍ରେସ ପ୍ରତିନିଧିମଣ୍ଡଳ, ମନ୍ତ୍ରୀଙ୍କୁ ପଦରୁ ହଟାଇବାକୁ ଦାବି

ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀଙ୍କ ନେତୃତ୍ବରେ କଂଗ୍ରେସର ଏକ ପ୍ରତିନିଧିମଣ୍ଡଳ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିଛନ୍ତି । କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ମଧ୍ୟ ଦାବି କରିଛି କଂଗ୍ରେସ । ଅଧିକ ପଢନ୍ତୁ...

ନୂଆଦିଲ୍ଲୀ: ଲଖିମପୁର ଖେରୀ ହିଂସା ଘଟଣାକୁ ନେଇ କ୍ରମାଗତ ବିଜେପିକୁ ଟାର୍ଗେଟ କରିଆସୁଛନ୍ତି ବିରୋଧୀ । ଏହାରି ମଧ୍ୟରେ ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀଙ୍କ ନେତୃତ୍ବରେ କଂଗ୍ରେସର ଏକ ପ୍ରତିନିଧିମଣ୍ଡଳ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିଛନ୍ତି । ଲଖିମପୁର ଖେରୀ ହିଂସାକାଣ୍ଡ ବିଷୟରେ ରାଷ୍ଟ୍ରପତିଙ୍କ ସହ ଆଲୋଚନା କରିଛି କଂଗ୍ରେସ ପ୍ରତିନିଧିମଣ୍ଡଳ । ଏହାସହିତ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ମଧ୍ୟ ଦାବି କରିଛି କଂଗ୍ରେସ ।

ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସମେତ ମଲ୍ଲିକାର୍ଜୁନ ଖଡଗେ, ଏକେ ଆଣ୍ଟୋନୀ ଓ ଗୁଲାମ ନବୀ ଆଜାଦ ରାଷ୍ଟ୍ରପତିଙ୍କୁ ଭେଟି ନିଜ ଦାବି ଜଣାଇଛନ୍ତି । ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିବା ପରେ କଂଗ୍ରେସ ନେତା ରାହୁଲ ଗାନ୍ଧୀ କହିଛନ୍ତି, ଲଖିମପୁର ଖେରୀରେ ପୀଡିତ ପରିବାରର ଦାବି ହେଉଛି ଯେ ତାଙ୍କ ପୁଅର ହତ୍ୟାକାରୀକୁ ଦଣ୍ଡ ମିଳୁ । ଯିଏ ହତ୍ୟା କରିଛି ତାଙ୍କ ବାପା ଦେଶର ଗୃହ ରାଷ୍ଟ୍ରମନ୍ତ୍ରୀ । ଯେତେ ପର୍ଯ୍ୟନ୍ତ ସେ ନିଜ ପଦରେ ଅଛନ୍ତି, ସେତେ ଯାଏଁ ନ୍ୟାୟ ମିଳିବ ନାହିଁ । ଏହି ବିଷୟରେ ରାଷ୍ଟ୍ରପତିଙ୍କୁ ଅବଗତ କରାଇଥିବା କହିଛନ୍ତି କଂଗ୍ରେସ ନେତା ।

ସେହପରି ପ୍ରିୟଙ୍କା ଗାନ୍ଧୀ କହିଛନ୍ତି, ରାଷ୍ଟ୍ରପତି ଆଶ୍ବସନା ଦେଇଛନ୍ତି । ସେ ଏହି ବିଷୟରେ ସରକାରଙ୍କ ସହ ଆଲୋଚନା କରିବେ । କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀଙ୍କ ବରଖାସ୍ତ ଦାବି କେବଳ କଂଗ୍ରେସର ନୁହେଁ, ବରଂ ଜନସାଧରଣ ଓ ପୀଡିତ ଚାଷୀଙ୍କ ଦାବି ବୋଲି କହିଛନ୍ତି ପ୍ରିୟଙ୍କା ।