କୋଲକାତା:ମହାପୁରଷ ମହମ୍ମଦଙ୍କ ସମ୍ପର୍କିତ ବିବାଦକୁ ନେଇ ହାଓ୍ବଡାରେ ଗତକାଲି (ଶୁକ୍ରବାର) ଦେଖିବାକୁ ମିଳିଥିବା ହିଂସାରେ କାର୍ଯ୍ୟାନୁଷ୍ଠାନ ଜାରି ରହିଛି । ଏପର୍ଯ୍ୟନ୍ତ ଘଟଣାରେ 70 ଅଭିଯୁକ୍ତଙ୍କୁ ଗିରଫ କରି ସାରିଲାଣି କୋଲକାତା ପୋଲିସ । ବର୍ତ୍ତମାନ ମଧ୍ୟ ହାଓ୍ବଡା ସମେତ ସମଗ୍ର କୋଲକାତାରେ ଚାପା ଉତ୍ତେଜନା ଲାଗିରହିଛି । ହିଂସା ପରେ ରାଜ୍ୟରେ ରାଜନୀତି ମଧ୍ୟ ଜୋର ଧରିଛି । ଆଜି ବିଜେପି ରାଜ୍ୟ ସଭାପତି ସୁକାନ୍ତ ମଜୁମଦାର ଘଟଣାସ୍ଥଳ ଗସ୍ତ କରିବା ବେଳେ ରାସ୍ତାରେ ତାଙ୍କୁ ପୋଲିସ ଗିରଫ କରିଥିଲା । ପରେ ସଂନ୍ଧ୍ୟାରେ ତାଙ୍କୁ ମୁକ୍ତ କରାଯାଇଛି ।
ଗତକାଲିର ହିଂସା ପରେ ଆଜି ବରିଷ୍ଠ ପୋଲିସ ଅଧିକାରୀଙ୍କୁ ବଦଳି କରିଛନ୍ତି ମମତା ସରକାର । କୋଲକାତା ଅତିରିକ୍ତ ପୋଲିସ କମିଶନରଙ୍କୁ ହାଓ୍ବଡାର ନୂତନ ପୋଲିସ କମିଶନର ଭାବେ ନିଯୁକ୍ତି ମିଳିଛି । ପଶ୍ଚିମ-ଉତ୍ତର ପୋଲିସ ଜୋନ DCP ସ୍ବାତୀ ଭାଙ୍ଗିଲିଆଙ୍କୁ ହାଓ୍ବଡା ରୁରାଲ ଏସପି ଭାବେ ନିଯୁକ୍ତି ମିଳିଛି । ସେହିପରି ହାଓ୍ବଡା ସିଟି ପୋଲିସ କମିଶନର ସି. ଚନ୍ଦ୍ରଶେଖର କୋଲକାତାର ପୋଲିସର ଯୁଗ୍ମ କମିଶନର ଭାବେ ବଦଳି ହୋଇଛନ୍ତି ।