ଶ୍ରୀନଗର: ଆସନ୍ତାକାଲି ପ୍ରଧାନମନ୍ତ୍ରୀଙ୍କ କାଶ୍ମୀର ଗସ୍ତ ପୂର୍ବରୁ କୁଲଗାମରେ ସୁରକ୍ଷା ବାହିନୀ ଓ ଆତଙ୍କବାଦୀଙ୍କ ମଧ୍ୟରେ ପୁଣି ଗୁଳି ବିନିମୟ ଆରମ୍ଭ ହୋଇଛି । ଏଥିରେ ଜଣେ ପାକିସ୍ତାନ ଆତଙ୍କବାଦୀ ସମେତ ଦୁଇ ଆତଙ୍କୀକୁ ସଫା କରିବାରେ ସଫଳ ହୋଇଛି ସୁରକ୍ଷା ବଳ । ଏବେ ମଧ୍ୟ ଗୁଳି ବିନିମୟ ଜାରି ରହିଥିବା କାଶ୍ମୀର ଜୋନ ପୋଲିସ ଟ୍ବିଟ କରି ସୂଚନା ଦେଇଛି ।
ସୂଚନା ଅନୁସାରେ, କୁଲଗାମ ଜିଲ୍ଲାର ମିରହମା ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ନେଇ ଗୁଇନ୍ଦା ସୂଚନା ମିଳିବା ପରେ ସର୍ଚ୍ଚ ଅପରେସନ ଆରମ୍ଭ କରିଥିଲା ସ୍ଥାନୀୟ ପୋଲିସ ଓ ସୁରକ୍ଷା ବଳର ମିଳିତ ଟିମ । ଲୁଚି ରହିଥବା ଆତଙ୍କବାଦୀ ସୁରକ୍ଷା ବାହିନୀ ଉପରେ ଗୁଳି ଚଳାଇବା ସହ ପାଲଟା ଜବାବ ଦେଇଥିଲେ ଯବାନ । କିଛି ସମୟର ଗୁଳି ବିନିମୟରେ ଜଣେ ସୀମାପାର ଆତଙ୍କୀ ସହ ମୋଟ 2 ଆତଙ୍କୀଙ୍କୁ ଧରାସାୟୀ କରିବାରେ ସୁରକ୍ଷା ବଳ ସଫଳ ହୋଇଥିବାବେଳେ ଏବେ ମଧ୍ୟ ଏନକାଉଣ୍ଟର ଜାରି ରହିଛି ।