ଦେବନହଲ୍ଲୀ (ବେଙ୍ଗାଲୁରୁ ଗ୍ରାମୀଣ ) : କର୍ଣ୍ଣାଟକରେ କନ୍ନଡ଼ ଭାଷାକୁ ନେଇ ବଢିଛି ତାତି । କର୍ଣ୍ଣାଟକ ରକ୍ଷା ବେଦିକେ ସଙ୍ଗଠନର ନାରାୟଣ ଗୌଡ଼ା ଗୋଷ୍ଠୀ ଦ୍ବାରା ଆଜି କର୍ଣ୍ଣାଟକରେ କନ୍ନଡ଼ ଭାଷାରେ ନାମଫଳକ ଲଗାଇବା ଦାବି ନେଇ ଏକ ବିଶାଳ ବିରୋଧ ରାଲି ଆୟୋଜିତ ହୋଇଥିଲା । ଏହି ଅବସରରେ ସଙ୍ଗଠନର କର୍ମକର୍ତ୍ତା ମାନେ ଇଂରାଜୀ ଭାଷାରେ ଲେଖାଯାଇ ଥିବା ସମସ୍ତ ବିଜ୍ଞାପନକୁ ଚିରି ଫାଡି ନିଜର ଆକ୍ରୋଶ ବ୍ୟକ୍ତ କରିଥିଲେ । ଏହି ରାଲି ଦେବନ ହଲ୍ଲୀର ସଦା ହଲ୍ଲୀ ଟୋଲରୁ ଆରମ୍ଭ ହୋଇ ବେଙ୍ଗାଲୁରୁ କବ୍ବନ ପାର୍କ ଯାଏଁ ଯାଇ ଥିଲା । ଏହି ସମୟରେ ରାସ୍ତାରେ ଥିବା ସମସ୍ତ ନେମ ପ୍ଲେଟ ଯାହା ଇଂରାଜୀ କିମ୍ବା ଅଣ-କନ୍ନଡ଼ ଭାଷାରେ ଲେଖା ଯାଇଥିଲା ସେ ସବୁକୁ କର୍ମୀ ମାନେ ଫାଡି ଦେଇଥିଲେ ।
ସହରରେ କୌଣସି ପ୍ରକାର ଅପ୍ରୀତିକର ପରିସ୍ଥିତି ନ ଉପୁଜିବା ପାଇଁ ଡିସିପି ଲକ୍ଷ୍ମୀ ପ୍ରସାଦଙ୍କ ନେତୃତ୍ବରେ କଡ଼ା ବନ୍ଦୋବସ୍ତ କରାଯାଇଥିଲା । ସହରର ସମସ୍ତ ଗୁରୁତ୍ବପୂର୍ଣ୍ଣ ସ୍ଥାନରେ ପୋଲିସ ବଳ ନିୟୋଜିତ ହୋଇଥିଲେ । ଏନେଇ ଜଣେ ଏସିପି , ୬ ଇନ୍ସପେକ୍ଟର, ୧୨ ସବ ଇନ୍ସପେକ୍ଟର ସମେତ ୫୦୦ରୁ ଅଧିକ ପୋଲିସ କର୍ମୀ ମୁତୟନ ହୋଇଥିଲେ । ବେଙ୍ଗାଲୁରୁ ଏୟାର ପୋର୍ଟ ରୋଡରେ ପୂର୍ବରୁ ବ୍ୟାରିକେଡ ଲଗାଯାଇଥିଲା ।
ପ୍ରକାଶଯୋଗ୍ୟ ଯେ କାରାବେ (କର୍ଣ୍ଣାଟକ ରକ୍ଷଣ ବେଦିକେ)ର କର୍ମକର୍ତ୍ତା ମାନେ କନ୍ନଡ଼ ଭାଷାରେ ନେମପ୍ଲେଟ ନ ଲଗାଉ ଥିବା ଲୋକଙ୍କ ଉପରେ ନିଜର ରାଗ ସୁଝାଇ ଥିଲେ । ଏହି ରାଲିର ନେତୃତ୍ବ ନେଇଥିବା ନାରାୟଣ ଗୌଡ଼ାଙ୍କୁ ପୋଲିସ ନିଜ ହେପାଜତରେ ନେଇଛି । ନାରାୟଣ ଗୌଡ଼ା ଉପରିସ୍ଥ ଅଣ-କନ୍ନଡ଼ ଅଧିକାରୀ ମାନଙ୍କୁ କାର୍ଯ୍ୟାନୁଷ୍ଠାନ ପାଇଁ ଦାୟୀ କରିବା ସହ ଏନେଇ ମୁଖ୍ୟମନ୍ତ୍ରୀଙ୍କୁ ଭେଟିବା କଥା କହିଛନ୍ତି ।