ନୂଆଦିଲ୍ଲୀ:ବହୁଚର୍ଚ୍ଚିତ ସିନା ବୋରା ହତ୍ୟାକାଣ୍ଡ ମାମଲାରେ ଆଜି(ଶୁକ୍ରବାର) ବାଇକୁଲା ଜେଲରୁ ମୁକୁଳିଲେ ମୁଖ୍ୟ ଅଭିଯୁକ୍ତ ଇନ୍ଦ୍ରାଣୀ ମୁଖାର୍ଜୀ । ସେ ବାରମ୍ବାର ଜାମିନ ଆବେଦନ କରିବା ପରେ ବୁଧବାର ଇନ୍ଦ୍ରାଣୀଙ୍କୁ ଜାମିନ ପ୍ରଦାନ କରିଥିଲେ ସୁପ୍ରିମକୋର୍ଟ । ଜେଲରୁ ବାହାରିବା ପରେ ପ୍ରଥମ ପ୍ରତିକ୍ରିୟାରେ ସେ ଖୁବ ଖୁସିଥିବା କହିଛନ୍ତି ।
୨୦୧୫ ମସିହାରେ ହତ୍ୟା ମାମଲାରେ ଗିରଫ ହେବା ପରେ ମୁଖାର୍ଜୀ ଜେଲ୍ରେ ଥିଲେ । ନିକଟରେ ମୁଖାର୍ଜୀ ତାଙ୍କ ଝିଅ ସିନା ବୋରା ଜୀବିତ ଥିବା ଦର୍ଶାଇ ସିବିଆଇକୁ ଏକ ଚିଠି ପଠାଇ ଆଲୋଡନ ସୃଷ୍ଟି କରିଥିଲେ । ଏହି ଘଟଣାରେ ଯଦି କୋର୍ଟଙ୍କ ହସ୍ତକ୍ଷେପ ନହୁଏ, ତେବେ ଏହା ଉପରେ କୌଣସି ପଦକ୍ଷେପ ନିଆଯିବ ନାହିଁ ବୋଲି CBI ସ୍ପଷ୍ଟ କରିଥିଲା । ମୁମ୍ବାଇ ପୋଲିସର ମାମଲା ଦାଏର ହେବା ପରେ ସିବିଆଇ ୨୦୧୫ ମସିହାରୁ ସିନା ବୋରା ମାମଲାର ତଦନ୍ତ କରୁଛି । ମୁମ୍ବାଇ ପୋଲିସ ଦ୍ବାରା ଦାଏର ହୋଇଥିବା ମାମଲା ଅନୁଯାୟୀ ଏପ୍ରିଲ୍ ୨୦୧୨ରେ ସିନା ବୋରାଙ୍କୁ ଅପହରଣ କରି ହତ୍ୟା କରାଯାଇଥିଲା ।