ଇସ୍ରାଏଲ: 21 ବର୍ଷ ପରେ ଭାରତକୁ ବ୍ରହ୍ମାଣ୍ଡ ସୁନ୍ଦରୀ ତାଜ । ଭାରତୀୟ ଭାବେ ହରନାଜ ହୋଇଛନ୍ତି ବ୍ରହ୍ମାଣ୍ଡ ସୁନ୍ଦରୀ (Miss Universe 2021) । ୮୦ ଜଣ ସୁନ୍ଦରୀଙ୍କୁ ପଛରେ ପକାଇ ବ୍ରହ୍ମାଣ୍ଡ ସୁନ୍ଦରୀ ବିଜୟ ମୁକୁଟ ପିନ୍ଧିଛନ୍ତି ପଞ୍ଜାବର ହରନାଜ ସାନ୍ଧୁ (Harnaaz Sandhu) । ଇସ୍ରାଏଲରେ ଅନୁଷ୍ଠିତ ୭୦ତମ ମିସ ୟୁନିଭର୍ସ ପ୍ରତିଯୋଗିତାରେ ସଫଳ ହୋଇଛନ୍ତି ହରନାଜ । ମେକ୍ସିକୋର ଆଣ୍ଡିଆ ମେଜା ହରନାଜଙ୍କୁ ବିଜୟ ମୁକୁଟ ପିନ୍ଧାଇଛନ୍ତି ।
୨୦୦୦ ମସିହାର ବଲିଉଡ ଅଭିନେତ୍ରୀ ଲାରା ଦତ୍ତ ବ୍ରହ୍ମାଣ ସୁନ୍ଦରୀ ମୁକୁଟ ପିନ୍ଧିଥିଲେ । ଏହାପରେ ଭାରତର ଆଉ କୌଣସି ପ୍ରତିଯୋଗୀ ଏହି ସଫଳତା ଆଣିନଥିଲେ । ଏବେ ହରନାଜ୍ ୨୧ ବର୍ଷ ପରେ ଭାରତକୁ ଏହି ଗୌରବ ଆଣିଦେଇଛନ୍ତି । ଏହାକୁ ମିଶାଇ ଭାରତ ତୃତୀୟ ଥର ଏହି ଟାଇଟଲ ହାସଲ କରିଛି । ମିସ ପାରାଗୱେଙ୍କୁ ପଛରେ ପକାଇ ପ୍ରତିଯୋଗିତାରେ ହରନାଜ୍ କୌର ପ୍ରଥମ ସ୍ଥାନ ହାସଲ କରିଛନ୍ତି । ମିସ୍ ସାଉଥ ଆଫ୍ରିକା ତୃତୀୟ ସ୍ଥାନରେ ରହିଛନ୍ତି ।
ପ୍ରତିଯୋଗିତାର ତୃତୀୟ ରାଉଣ୍ଡରେ ସମସ୍ତ ପ୍ରତିଯୋଗୀ ସମାନ ଉତ୍ତର ଦେଇଥିଲେ । ଏହା ପରେ ଆଜିର ଯୁବଗୋଷ୍ଠୀ ସମ୍ମୁଖୀନ ହେଉଥିବା ଚାପରୁ ମୁକାବିଲା ପାଇଁ ଆପଣ କେଉଁ ପରାମର୍ଶ ଦେବେ ବୋଲି ଏକ ପ୍ରଶ୍ନ କରାଯାଇଥିଲା । ଉତ୍ତରରେ ହରନାଜ କହିଥିଲେ ବର୍ତ୍ତମାନ ସମୟରେ ଯୁବକଙ୍କର ବଡ ସମସ୍ୟା ହେଉଛି ନିଜ ଉପରୁ ଭରସା ଉଠିଯିବା । ସେମାନେ ଅନନ୍ୟ ଏବଂ ଏହା ତାଙ୍କୁ ଆହୁରି ସୁନ୍ଦର କରିଥାଏ । ନିଜକୁ ଅନ୍ୟ ସହ ତୁଳନା କରିବା ବନ୍ଦ କରିବାକୁ ପଡିବ । ନିଜ ପାଇଁ ମୁହଁ ଖୋଲିବାକୁ ପଡିବ । କାରଣ ସେମାନେ ତାଙ୍କ ଜୀବନର ଲିଡର । ଏହା ସେମାନଙ୍କୁ ବୁଝିବାକୁ ପଡିବ । ମୁଁ ନିଜ ଉପରେ ବିଶ୍ବାସ କରେ । ସେଥିପାଇଁ ଆଜି ଏହି ସ୍ଥାନରେ ଅଛି ବୋଲି କହିଥିଲେ ହରନାଜ । ଯାହା ବିଚାରକଙ୍କ ହୃହୟକୁ ଛୁଇଁଥିଲା ।