ନୂଆଦିଲ୍ଲୀ:ଗାଜା ଓ ଇସ୍ରାଏଲ ମଧ୍ୟରେ ସଂଘର୍ଷ ଆଜି 5ମ ଦିନରେ ପହଞ୍ଚିଥିବା ବେଳେ ଏହା କ୍ରମଶଃ ଜଟିଳ ହେବାରେ ଲାଗିଛି । ଏବେ ବିଭିନ୍ନ ଦେଶ ଇସ୍ରାଏଲରେ ଥିବା ନିଜ ନାଗରିକଙ୍କ ସୁରକ୍ଷା ଚିନ୍ତାରେ ଅଛନ୍ତି । ଆକ୍ରମଣରେ ଆମେରିକା ସମେତ ଅନ୍ୟ କିଛି ଦେଶର ନାଗରିକଙ୍କ ମୃତ୍ୟୁ ହୋଇଥିବା ମଧ୍ୟ ସୂଚନା ସାମ୍ନାକୁ ଆସିଛି । ଏହାରି ମଧ୍ୟରେ ଆଜି ଟେଲ ଆଭିଭରେ ଅବସ୍ଥାପିତ ଭାରତୀୟ ଦୂତାବାସ ନିଜ ନାଗରିକଙ୍କ ପାଇଁ ଏକ 24 ଘଣ୍ଟିଆ ହେଲ୍ପଡେସ୍କ ଖୋଲିଛି । ସତର୍କ ରହିବା ସହ ସୁରକ୍ଷିତ ସ୍ଥାନରେ ରହିବା ଓ ସ୍ଥାନ ପରିବର୍ତ୍ତନ କରି ଅନ୍ୟ କେଉଁ ଆଡକୁ ଯାତ୍ରା ନକରିବା ପାଇଁ ଦୂତାବାସ ପକ୍ଷରୁ ଜାରି ନିର୍ଦ୍ଦେଶାବଳୀରେ କୁହାଯାଇଛି ।
ଆଜି ଇସ୍ରାଏଲୀ ସହର ଟେଲ ଆଭିଭରେ ଅବସ୍ଥାପିତ ଭାରତୀୟ ଦୂତାବାସ ପକ୍ଷରୁ ଏକ 24 ଘଣ୍ଟିଆ ହେଲ୍ପଡେସ୍କ ଖୋଲାଯାଇଛି । କୌଣସି ଜରୁରୀ ସୂଚନା ଓ ଯୁଦ୍ଧଗ୍ରସ୍ତ ଅଞ୍ଚଳରେ ଫସି ରହିଥିଲେ ଦୂତାବାସ ସହ ଯୋଗାଯୋଗ କରିବା ପାଇଁ ଦୁଇଟି ଜରୁରୀ ନମ୍ବର ଓ ଗୋଟିଏ ମେଲ-ଆଇଡି ମଧ୍ୟ ପ୍ରଦାନ କରାଯାଇଛି । + 972-35226748 ଓ + 972-543278392 ନମ୍ବର ମାଧ୍ୟମରେ ସେଠାରେ ଥିବା ଭାରତୀୟ ଦୂତାବାସକୁ ଯୋଗାଯୋଗ କରିପାରିବେ । ଅନ୍ୟପଟେ ଦୂତାବାସର ଅଫିସିଆଲ ମେଲ-ଆଇଡି cons1.telaviv@mea.gov.in ରେ ଦୂତାବାସ ସହ ଯୋଗାଯୋଗ କରିହେବ । ଭୟଭୀତ ହୋଇ କୌଣସି ନିଷ୍ପତ୍ତି ଗ୍ରହଣ କରିବା ପୂର୍ବରୁ ଯୋଗାଯୋଗ କରିବା ସହ ସୁରକ୍ଷା ପ୍ରଟୋଲକ କଡାକଡି ଅନୁସରଣ କରିବାକୁ ଦୂତାବାସ କହିଛି ।
ସେହିପରି ଇସ୍ରାଏଲର ଥିବା ଆନ୍ଧ୍ର ପ୍ରଦେଶର ପ୍ରବାସୀ ତେଲୁଗୁ ଭାଷାଭାଷୀ ଲୋକଙ୍କ ପାଇଁ ମଧ୍ୟ ପ୍ରବାସୀ ତେଲଗୁ ସମାଜ (NRTs) ପକ୍ଷରୁ 24 ଘଣ୍ଟିଆ ହେଲ୍ପଲାଇନ ନମ୍ବର ଜାରି କରାଯାଇଛି । +91 85000 27678 (W), 0863-2340678 ନମ୍ବରରେ ସେମାନେ ଯୋଗାଯୋଗ କରି ତେଲଗୁ ଭାଷାରେ ସୂଚନା ଓ ସହାୟତା ପ୍ରାପ୍ତ କରିପାରିବେ । ବର୍ତ୍ତମାନ ସୁଦ୍ଧା କେହି ଭାରତୀୟ ନାଗରିକ ମୃତାହତ ହୋଇଥିବା ନେଇ କୌଣସି ସୂଚନା ନଥିବା ଭାରତୀୟ ଦୂତାବାସ କହିଛି । ଏବେ ସୁଦ୍ଧା ଉଦ୍ଧାର ଅପରେସନ ଆରମ୍ଭ କରାଯିବା ସମ୍ପର୍କରେ ମଧ୍ୟ କିଛି ପ୍ରକାଶ କରାଯାଇନାହିଁ । କେବଳ ଭାରତୀୟ ନାଗରିକମାନେ ସୁରକ୍ଷିତ ସ୍ଥାନରେ ରହିବା ସହ ଯାତ୍ରା ନକରିବାକୁ ଦୂତାବାସ କହିଛି ।