କିଭ:ୟୁକ୍ରେନର 4ଟି ଅଞ୍ଚଳରେ ଋଷ ରାଷ୍ଟ୍ରପତି ପୁଟିନ ସାମରିକ ଶାସନ ଲାଗୁ ନେଇ ଘୋଷଣା କରିବା ପରେ ପୁଣି ଥରେ ଋଷ-ୟୁକ୍ରେନ ମଧ୍ୟରେ ସଂଘର୍ଷ ଭୀଷଣ ରୂପ ନେବାକୁ ଯାଉଥିବା ଆଶଙ୍କା ପ୍ରକାଶ ପାଇଛି । ଏପରି ସ୍ଥିତିରେ ସେଠାରେ ଥିବା ଭାରତୀୟ ନାଗରିକଙ୍କ ସୁରକ୍ଷା ନେଇ ପୁଣି ଚିନ୍ତା ମଧ୍ୟ ବଢିଛି । ଏପରି ସ୍ଥିତିରେ ଭାରତୀୟଙ୍କ ପାଇଁ ନିର୍ଦ୍ଦେଶାବଳୀ ଜାରି କରିଛି ୟୁକ୍ରେନ ରାଜଧାନୀ କିଭ୍ ରେ ଥିବା ଭାରତୀୟ ଦୂତାବାସ । ଏବେ ୟୁକ୍ରେନରେ ଥିବା ଭାରତୀୟ ନାଗରିକ ଓ ଛାତ୍ରଛାତ୍ରୀ ଅଯଥାରେ ଘରୁ ନବାହାରିବା ସହ ଯଥା ସମ୍ଭବ ୟୁକ୍ରେନ ଛାଡି ଭାରତ ଫେରି ଆସିବାକୁ ନିର୍ଦ୍ଦେଶନାମାରେ କହିଛି ଦୂତାବାସ (Indian Embassy issued advisory to leave Ukraine) ।
ସ୍ଥିତି ସାମାନ୍ୟ ଶାନ୍ତ ପଡିବା ପରେ ସେଠାରେ ଏବେ ମଧ୍ୟ ଅଳ୍ପ କିଛି ଭାରତୀୟ ରହିଛନ୍ତି । ଏବେ ପୁଣି ୟୁକ୍ରେନରେ ଋଷ ତାର ସାମରିକ ଅଭିଯାନକୁ ଆହୁରି ବ୍ୟାପକ କରିବାକୁ ଯାଉଛି । ଆଜି ଏନେଇ ଋଷ ରାଷ୍ଟ୍ରପତି ଭ୍ଲାଦମିର ପୁଟିନ ୟୁକ୍ରେନର 4 ଅଞ୍ଚଳରେ ସାମରିକ ଆଇନ ଲାଗୁ ନେଇ ଘୋଷଣା କରିଛନ୍ତି । ଏହି 4 ସହରର ସମସ୍ତ ନିୟନ୍ତ୍ରଣ ଏବେ ଋଷ ସେନା ନିକଟରେ ରହିବ । ଋଷର ଏପରି ଆଭିମୁଖ୍ୟ ପରେ ୟୁକ୍ରେନ ମଧ୍ୟ ମୁକାବିଲାକୁ ଆହୁରି ବ୍ୟାପକ କରିବା ନେଇ ଅନୁମାନ ପ୍ରକାଶ ପାଇଛି ।