ଜୟପୁର:ଶତ୍ରୁ ଦେଶର ଗୁପ୍ତ ତଥ୍ୟ ଜାଣିବାକୁ ଗୁପ୍ତଚର ଅସ୍ତ୍ର ପାଲଟିଛି ହନିଟ୍ରାପ । ଏହାକୁ ବ୍ୟବହାର କରି ଅନ୍ୟ ଦେଶର ସୈନିକ ମାନଙ୍କୁ ଟାର୍ଗେଟ କରାଯାଉଛି । ଯାହା ଫଳରେ ସେମାନେ ସୁରକ୍ଷା ବ୍ୟବସ୍ଥା ସହ ଜଡ଼ିତ ସମସ୍ତ ଗୁରୁତ୍ବପୂର୍ଣ୍ଣ ତଥ୍ୟ ପାଇବାରେ ସଫଳ ହେଉଛନ୍ତି । ରାଜସ୍ଥାନ ଇଣ୍ଟେଲିଜେନ୍ସର ରାଜ୍ୟ ସ୍ବତନ୍ତ୍ର ଶାଖାର ତଦନ୍ତରେ ଏଭଳି ଏକ ମାମଲା ସାମନାକୁ ଆସିଛି । ପାକିସ୍ତାନ ଗୁପ୍ତଚର ସଂସ୍ଥାକୁ ଭାରତୀୟ ସେନା ସମ୍ବନ୍ଧୀୟ ଗୁପ୍ତ ତଥ୍ୟ ପ୍ରଦାନ କରି ସେନା ଅଧିକାରୀ ପ୍ରଦୀପ କୁମାର ଗିରଫ ହୋଇଛନ୍ତି ।
DG ଇଣ୍ଟେଲିଜେନ୍ସ ଉମେଶ ମିଶ୍ରାଙ୍କ ସୂଚନା ଅନୁଯାୟୀ, ଯୋଧପୁରରେ ଭାରତୀୟ ସେନାର ସମ୍ବେଦନଶୀଳ ରେଜିମେଣ୍ଟରେ କାର୍ଯ୍ୟରତ ସେନା ଅଧିକାରୀ ପ୍ରଦୀପ କୁମାର ସୋସିଆଲ ମିଡିଆ ମାଧ୍ୟମରେ ପାକିସ୍ତାନର ଗୁପ୍ତଚର ଏଜେନ୍ସି ସହ ଜିଡ଼ିତ ଥିଲେ । ଏଥିସହ ସେ ହ୍ବାଟ୍ସଆପ୍ ଯୋଗେ ଏଜେନ୍ସିର ଜଣେ ମହିଳାଙ୍କ ସହ ନିରନ୍ତର ଭାବେ ଯୋଗାଯୋଗରେ ଥିଲେ । ଗତ ମେ 18 ତାରିଖ ଅପରାହ୍ନରେ ପ୍ରଦୀପଙ୍କୁ ଗିରଫ କରାଯାଇ ଜୟପୁରକୁ ଅଣାଯାଇ ପଚରାଉଚରା କରାଯାଇଥିଲା ।
ପଚରାଉଚରା ପରେ ତାଙ୍କୁ ଶନିବାର ରାଜ୍ୟ ସ୍ବତନ୍ତ୍ର ଶାଖା ଗିରଫ କରିଛି । ଘଟଣାରେ ତଦନ୍ତ ବେଳେ ଜଣାପଡ଼ିଛି ଯେ, 24 ବର୍ଷୀୟ ପ୍ରଦୀପ 3 ବର୍ଷ ପୂର୍ବେ ଭାରତୀୟ ସେନାରେ ଯୋଗ ଦେଇଥିଲେ ଏବଂ ତାଲିମ ପରେ ତାଙ୍କୁ ଯୋଧପୁରରେ ତାଙ୍କୁ ନିଯୁକ୍ତି ମିଳିଥିଲା । ପ୍ରାୟ 7 ମାସ ପୂର୍ବେ ପ୍ରଦୀପଙ୍କ ମୋବାଇଲକୁ ଉକ୍ତ ମହିଳାଙ୍କ ଫୋନ ଯାଇଥିଲା । ମହିଳା ଜଣକ ନିଜକୁ ମଧ୍ୟପ୍ରଦେଶ ଗ୍ବାଲିୟରର ବାସିନ୍ଦା ବୋଲି କହିଥିଲେ । ଏଥିସହ ସେ ବାଙ୍ଗାଲୋରର ମିଲିଟାରୀ ନର୍ସିଂ ସର୍ଭିସରେ କାର୍ଯ୍ୟରତ ଥିବା କହିଥିଲେ । ଏହାପରେ ପାକିସ୍ତାନୀ ମହିଳା ଏଜେଣ୍ଟ ପ୍ରଦୀପଙ୍କୁ ହନି ଟ୍ରାପରେ ଫସାଇ ହ୍ବାଟ୍ସଆପ ଚାଟିଂ ସହ ଭିଡ଼ିଓ କଲ ଆଦି କରୁଥିଲେ ।
ବିଭିନ୍ନ ଲାଳସା ଦେଖାଇ ସେନା ସହ ଜଡିତ ସମସ୍ତ ଗୁପ୍ତ ତଥ୍ୟ ପାଇବାରେ ସେ ସଫଳ ହେଲେ । ତେବେ ପ୍ରଦୀପଙ୍କ ମୋବାଇଲ ନମ୍ବର ଆଧାରରେ ମହିଳା ଜଣକ ଅନ୍ୟ କର୍ମଚାରୀଙ୍କୁ ଶିକାର କରିଛନ୍ତି ନା ନାହିଁ ସେନେଇ ତଦନ୍ତ ଜାରି ରହିଛି । ଅପରପକ୍ଷେ ପ୍ରଦୀପଙ୍କ ବିରୁଦ୍ଧରେ ଅଫିସିଆଲ ସିକ୍ରେଟ ଆକ୍ଟ 1923 ଅନୁଯାୟୀ ଏକ ମାମଲା ରୁଜୁ କରି ଗିରଫ କରାଯାଇଛି । ପ୍ରଦୀପଙ୍କୁ ପଚରାଉଚରା କରାଯିବା ପରେ ଅଧିକ ଖୁଲାସା ହେବାର ଅନୁମାନ କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
