ନୂଆଦିଲ୍ଲୀ: ଆକାଶରେ ସେମାନେ ଜାଗ୍ରତ ପ୍ରହରୀ ବାୟୁବୀର । ଗଗନରେ ଯାହାଙ୍କ ଗର୍ଜନ ଦେଖି ଥରିଉଠେ ଶତ୍ରୁ ଛାତି । ଦେଶ ମାଟି ମାଆର ସୁରକ୍ଷା ନେଇ ବଳିଷ୍ଠ ଶକ୍ତି ଦେଖାଉଥିବା ଚତୁର୍ଥ ବୃହତ୍ତମ ଏୟାରଫୋର୍ସ ଭାରତୟୀ ବାୟୁସେନା (IAF) । ଆଜି ସେହି ଭାରତୀୟ ବାୟୁସେନା ପ୍ରତିଷ୍ଠାକୁ 91 ବର୍ଷ ପୂରଣ ହୋଇଛି । ପ୍ରତିବର୍ଷ ଅକ୍ଟୋବର 8 ତାରିଖକୁ ଭାରତୀୟ ବାୟୁସେନା ଦିବସ ଭାବେ ପାଳନ କରାଯାଏ । ଆଜି 91ତମ ବାୟୁସେନା ଦିବସରେ ଇଣ୍ଡିଆନ ଏୟାରଫୋର୍ସର ନୂଆ ପ୍ରତୀକ ଉନ୍ମୋଚନ ହେବ । ଉତ୍ତରପ୍ରଦେଶ ପ୍ରୟାଗରାଜ ବାମରାଉଲିରେ ମେଗା ଏୟାର ଶୋ' ଅନୁଷ୍ଠିତ ହେବ । 72 ବର୍ଷ ପରେ ବାୟୁସେନାଙ୍କୁ ମିଳିବ ନୂଆ ଧ୍ବଜା । ଶକ୍ତି, ସାମର୍ଥ୍ୟ ଓ ଶୌର୍ଯ୍ୟ ଦେଖାଇବେ ଭାରତୀୟ ବାୟୁସେନା । ଗଗନରେ ଗର୍ଜନ କରିବେ ପବନ ସହ କଥା ହେବେ ବାୟୁବୀର । 100 ବିମାନ ଦେଖାଇବେ ଦମ । ଗଗନରେ ପବନ ସହ କଥା ହେବେ ସୁଖୋଇ 30, ମିଗ 29, ମିଗ-21 ମିରାଜ, ଜାଗୁଆର ଓ ତେଜସ ଭଳି ଯୁଦ୍ଧବିମାନ ।
ବାୟୁସେନା ଦିବସ ଇତିହାସ: 1932 ମସିହା ଅକ୍ଟୋବର 8 ତାରିଖରେ ଭାରତୀୟ ବାୟୁସେନା ପ୍ରତିଷ୍ଠା ହୋଇଥିଲା । ୟୁକେର ରୟାଲ ଏୟାର ଫୋର୍ସକୁ ସହାୟତା ଯୋଗାଇବା ପାଇଁ ପରାଧୀନ ଭାରତରେ ବାୟୁସେନା ଗଠନ ହୋଇଥିଲା । ଦ୍ବିତୀୟ ବିଶ୍ବଯୁଦ୍ଧରେ ଏହାର ଗୁରୁତ୍ବପୂର୍ଣ୍ଣ ଭୂମିକା ରୟାଲ ଇଣ୍ଡିଆନ ଏୟାର ଫୋର୍ସ ଭାବେ ବିଶ୍ବ ଦରବାରରେ ପରିଚିତ ହୋଇଥିଲା । 1950 ମସିହାରେ ଏହା ଭାରତୀୟ ବାୟୁସେନା ନାମରେ ନାମିତ ହୋଇଥିଲା । ସ୍ବାଧୀନତା ପରେ 1954 ଏପ୍ରିଲ 1 ତାରିଖରେ ସୁବ୍ରୋତ ମୂଖାର୍ଜୀଙ୍କୁ ଭାରତୀୟ ବାୟୁସେନାର ପ୍ରଥମ ବାୟୁ ସେନା ପ୍ରମୁଖ ନିଯୁକ୍ତ କରାଯାଇଥିଲା । ଦିଲ୍ଲୀରେ ଭାରତୀୟ ବାୟୁସେନା ମୁଖ୍ୟାଳୟ ରହିଛି । ପ୍ରଥମେ ଦିଲ୍ଲୀର ପାଲାମ ବିନାମବନ୍ଦରରେ ପ୍ରଥମ ଦିବସ ପାଳନ ହୋଇଥିଲା ।
ଆମେରିକା, ଚୀନ ଓ ଋଷିଆ ପରେ ବିଶ୍ବର ଚତୁର୍ଥ ସର୍ବବୃହତ୍ ବାୟୁଶକ୍ତି ହେଉଛି ଭାରତୀୟ ବାୟୁସେନା । ଭାରତୀୟ ବାୟୁସେନାର ମୋଟ 'ନଭମ ସ୍ପର୍ଶମ ଦୀପ୍ତମ' ଅଟେ । ଯାହାର ଅର୍ଥ ଗୌରବର ସହ ଆକାଶକୁ ସ୍ପର୍ଶ କରିବା । ଭଗବତ ଗୀତାର ୧୧ତମ ଅଧ୍ୟାୟରୁ ଏହା ନିଆଯାଇଛି । ଭାରତୀୟ ବାୟୁସେନାରେ ପ୍ରାୟ ୧୪୦୦୦ ଏୟାରକ୍ରାଫ୍ଟ ଏବଂ ୧, ୭୦,୦୦୦ରୁ ଅଧିକ ସୈନିକ ରହିଛନ୍ତି । ଉତ୍ତରପ୍ରଦେଶର ଗାଜିଆବାଦସ୍ଥିତ ହିନ୍ଦନ ଏୟାରଫୋର୍ସ ଷ୍ଟେସନ ଏସିଆର ସର୍ବବୃହତ ଏବଂ ବିଶ୍ବର ଅଷ୍ଟମ ବୃହତ ବିମାନ ଘାଟି ଅଟେ । ପ୍ରାକୃତିକ ବିପର୍ଯ୍ୟୟ ସମୟରେ ରିଲିଫ କାର୍ଯ୍ୟରେ IAF ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥାଏ ।