ଲକ୍ଷ୍ନୌ:ବହୁଚର୍ଚ୍ଚିତ ଜ୍ଞାନବ୍ୟାପୀ ମାମଲାରେ ବିଜ୍ଞାନଭିତ୍ତିକ ସର୍ଭେ ରିପୋର୍ଟ ବାରାଣାସୀ କୋର୍ଟରେ ଦାଖଲ କରିଛି ଭାରତୀୟ ପ୍ରତ୍ନତାତ୍ତ୍ବିକ ସଂସ୍ଥା (ASI) । କୋର୍ଟଙ୍କ ନିର୍ଦ୍ଦେଶ କ୍ରମେ ଏହି ସର୍ଭେ ଅଗଷ୍ଟ 4 ତାରିଖରୁ ଆରମ୍ଭ ହୋଇଥିଲା । ସଂସ୍ଥା ମୁଦ୍ଦା ଲଫାପାରେ ଏହି ରିପୋର୍ଟ କୋର୍ଟରେ ଦାଖଲ କରିଛି ।
ମିଳିଥିବା ସୂଚନା ଅନୁସାରେ, ବାରାଣାସୀ ଜିଲ୍ଲା ଜଜଙ୍କ ନିକଟରେ ଏହି ରୋପୋର୍ଟ ଦାଖଲ କରିଛି ସଂସ୍ଥା । ତେବେ ଏହି ରିପୋର୍ଟକୁ ସାର୍ବଜନୀନ କରିବା ଓ ଏହାର କପି ମାମଲାର ସମସ୍ତ ପକ୍ଷଙ୍କୁ ପ୍ରଦାନ କରିବା ପାଇଁ ଅନୁମତି ଦେବାକୁ ହିନ୍ଦୁପକ୍ଷ କୋର୍ଟରେ ଆବେଦନ ମଧ୍ୟ କରିଥିଲେ । ମାତ୍ର ଏହି ରିପୋର୍ଟ କେବଳ ମୁଦ୍ଦା ଲଫାପାରେ କୋର୍ଟରେ ହିଁ ଦାଖଲ ହୋଇଛି । ଡିସେମ୍ବର 11 ତାରିଖରେ ସର୍ଭେ ଶେଷ କରିବାକୁ କୋର୍ଟଙ୍କୁ ଅଧିକ ସମୟ ମାଗିଥିଲା ଏଏସଆଇ । କୋର୍ଟ ମଧ୍ୟ ଏଏସଆଇକୁ ଆଉ 10 ଦିନ ଅଧିକ ପ୍ରଦାନ ଦେଇଥିଲେ । 18 ତାରିଖରେ ରିପୋର୍ଟ ଦାଖଲ କରିବା ପାଇଁ ଶେଷ ତାରିଖ ପ୍ରଦାନ କରାଯାଇଥିଲା ।
କୋର୍ଟଙ୍କ ନିର୍ଦ୍ଦେଶ ପରେ ଅଗଷ୍ଟ 4 ତାରିଖରେ ପ୍ରତ୍ନତାତ୍ତ୍ବିକ ବିଭାଗ ଏହି ବିଜ୍ଞାନ ଭିତ୍ତିକ ସର୍ଭେ ଆରମ୍ଭ କରିଥିଲା । ନିର୍ଦ୍ଧାରିତ ସମୟଠାରୁ ସର୍ଭେ ଶେଷ କରିବା ବେଶ ବିଳମ୍ବ ହୋଇଥିଲା । ଏକାଧିକ ଥର ସର୍ଭେ ସମୟ ଅବଧିକୁ କୋର୍ଟ ସମ୍ପ୍ରସାରିତ କରିଛନ୍ତି । ପ୍ରାୟ 100 ଦିନ ପରେ ଏହି ସର୍ଭେ ଶେଷ ହୋଇଛି । ଏବେ ସର୍ଭେର ସଂସ୍ଥା କଣ ଦର୍ଶାଇଛି, ତା’ ଉପରେ ପରବର୍ତ୍ତୀ ପ୍ରକ୍ରିୟା ନିର୍ଭର କରୁଛି । ମାତ୍ର ଏହି ସର୍ଭେ ହିନ୍ଦୁପକ୍ଷଙ୍କ ଦାବି ସହ ମେଳଖାଉଥିବା ମଧ୍ୟ କୁହାଯାଉଛି ।