ନୂଆଦିଲ୍ଲୀ: ଲୋକପ୍ରିୟପଞ୍ଜାବୀ ଗାୟକ ତଥା କଂଗ୍ରେସ ନେତା ସିଦ୍ଧୁ ମୁସେଓ୍ବାଲଙ୍କୁ ନିର୍ମମ ହତ୍ୟା ପରେ ସମଗ୍ର ପଞ୍ଜାବରେ ତୀବ୍ର ଅସନ୍ତୋଷ ପ୍ରକାଶ ପାଇବାରେ ଲାଗିଛି । ଏହାରି ମଧ୍ୟରେ ଆଇନ ଶୃଙ୍ଖଳା ଓ ପୋଲିସର ଅପରାଗତା ନେଇ ମଧ୍ୟ ଅସନ୍ତୋଷ ଚରମ ସୀମାରେ ପହଞ୍ଚିଛି । ତେଣୁ ଲୋକଙ୍କ ଆକ୍ରୋଶକୁ ପ୍ରଶମିତ କରିବା ପାଇଁ କୌଣସି ବଡ କାର୍ଯ୍ୟାନୁଷ୍ଠାନ ଗ୍ରହଣ କରିପାରେ ପଞ୍ଜାବ ପୋଲିସ । ଏହି ହତ୍ୟାକାଣ୍ଡରେ ସମ୍ପୃକ୍ତି ସନ୍ଦେହ କରାଯାଉଥିବା କୁଖ୍ୟାତ ଗ୍ୟାଙ୍ଗଷ୍ଟାର ଲରେନ୍ସ ବିଷ୍ଣୋଇକୁ ଘାରିଛି ଏନକାଉଣ୍ଟରର ଭୟ । ନୂଆଦିଲ୍ଲୀର ତିହାର ଜେଲରେ ଥିବା ଲରେନ୍ସ କୌଣସି କାରଣ ଦର୍ଶାଇ ପଞ୍ଜାବ ପୋଲିସ ତାକୁ ଏନକାଉଣ୍ଟର କରି ଦେଇପାରେ ବୋଲି ଆଶଙ୍କାରେ ସୁରକ୍ଷା ପାଇଁ ଦିଲ୍ଲୀ ହାଇକୋର୍ଟରେ ଦ୍ବାରସ୍ଥ ହୋଇଛି ।
ଗ୍ୟାଙ୍ଗଷ୍ଚାର ଲରେନ୍ସର ଓକିଲ ବିଶାଲ ଚୋପ୍ରା ଆବେଦନରେ ଦର୍ଶାଇଛନ୍ତି, ବର୍ତ୍ତମାନ ସ୍ଥିତିକୁ ଦେଖି ପଞ୍ଜାବ ପୋଲିସ କୌଣସି ମୌକା କିମ୍ବା ଏପରିକି ଜେଲରେ ମଧ୍ୟ ଲରେନ୍ସଙ୍କୁ ଗୁଳି କରିପାରେ । ତେଣୁ କୋର୍ଟ ଏହି ଆଶଙ୍କାକୁ ଗମ୍ଭୀରତାର ସହ ନେଇ ସୁରକ୍ଷା ପ୍ରଦାନ କରନ୍ତୁ । ଲରେନ୍ସ ଜଣେ ଛାତ୍ର ନେତା ଥିଲା । ତାଙ୍କ ବିରୋଧରେ ରାଜନୈତିକ ଉଦ୍ଦେଶ୍ୟରେ ଏକାଧିକ ମମଲା ରୁଜୁ କରାଯାଇ ତାକୁ ଫସାଇବାର ପ୍ରୟାସ କରାଯାଇଛି । ତେଣୁ ଲରେନ୍ସ ବିରୋଧରେ ପଞ୍ଜାବ ହରିୟାଣା ଓ ରାଜସ୍ଥାନରେ ଏକାଧିକ ମାମଲା ଥିବା ବେଳେ କୌଣସି ପୁରୁଣା ଓ୍ବାରେଣ୍ଟରେ ପୋଲିସ ତାଙ୍କୁ ହେପାଜତକୁ ନେଇପାରେ ବୋଲି ଲରେନ୍ସର ଓକିଲ ଆବେଦନର ଆଶଙ୍କା ପ୍ରକାଶ କରିଛନ୍ତି ।