ନୂଆଦିଲ୍ଲୀ: ଉତ୍ତର ପ୍ରଦେଶ ନିର୍ବାଚନ ପୂର୍ବରୁ କଂଗ୍ରେସରୁ ଇସ୍ତାଫା ଦେଇ ବିଜେପିରେ ସାମିଲ ହେଲେ ପୂର୍ବତନ କେନ୍ଦ୍ରମନ୍ତ୍ରୀ ରତନଜିତ ପ୍ରତାପ ନାରାୟଣ ସିଂ । ଆଜି ବିଜେପି ମୁଖ୍ୟାଳୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପସ୍ଥିତିରେ ସେ ବିଜେପିରେ ସାମିଲ ହୋଇଛନ୍ତି । କିଛି ସମୟ ପୂର୍ବରୁ ସେ କଂଗ୍ରେସରୁ ଇସ୍ତାଫା ଦେଇଖିବା ଘୋଷଣା କରିବା ସହ ସେ ତାଙ୍କ ଇସ୍ତଫାପତ୍ର ମଧ୍ୟ ଟ୍ବିଟ କରିଥିଲେ ।
ନିଜ ଇସ୍ତଫା ସମ୍ପର୍କରେ ସୂଚନା ଦେଇ ସିଂ କହିଛନ୍ତି, ମହାନ ଗଣତନ୍ତ୍ରର ଉତ୍ସବ ପାଳନ ଅବସରରେ ସେ ତାଙ୍କର ନୂଆ ରାଜନୈତିକ ଯାତ୍ରାର ଏକ ନୂତନ ଅଧ୍ୟାୟ ଆରମ୍ଭ କରିବାକୁ ଯାଉଛନ୍ତି । ଦଳ ହାଇକମାଣ୍ଡ ସୋନିଆ ଗାନ୍ଧୀଙ୍କୁ ଲେଖିଥିବା ଇସ୍ତଫାପତ୍ରରେ ସିଂ ଲେଖିଛନ୍ତି, ସେ କଂଗ୍ରେସର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଉଛନ୍ତି । ତାଙ୍କୁ ଦଳରେ ବିଭିନ୍ନ ଦାୟିତ୍ବ ମିଳିଥିବାରୁ ସେ ସୋନିଆଙ୍କୁ ଧନ୍ୟବାଦ ମଧ୍ୟ ଦେଇଛନ୍ତି ।
ତେବେ ସେ ଇସ୍ତଫା ପୂର୍ବରୁ ନିଜ ଟ୍ବିଟର ହ୍ୟାଣ୍ଡଲର ବାୟୋକୁ ମଧ୍ୟ ପରବର୍ତ୍ତନ କରିଥିବା ନଜର ଆସିଥିଲା । AICC ଦାୟିତ୍ୱରେ ଥିବା ଝାଡ଼ଖଣ୍ଡ କଂଗ୍ରେସ ପ୍ରଭାରୀ, କଂଗ୍ରେସ ମୁଖପାତ୍ର, ପୂର୍ବତନ ଗୃହ ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ବରେ ଥିବା ଉଲ୍ଲେଖ ରହିଥିବା ବେଳେ ସେ ଏହି ସବୁ ସୂଚନାକୁ ନଜ ଟ୍ବିଟରରୁ ସେ ହାଟାଇଥିଲେ । ପରେ ସେ ବିଜେପିରେ ସାମିଲ ହେବା ଚର୍ଚ୍ଚା ଲାଗି ରହିଥିବା ବେଳେ ସେ କିଛି ସମୟ ପୂର୍ବରୁ ବିଧିବଦ୍ଧ ଭାବେ ବିଜେପିରେ ସାମିଲ ହୋଇଛନ୍ତି ।