ନୂଆଦିଲ୍ଲୀ:ଫ୍ରାନ୍ସରେ ଅନୁଷ୍ଠିତ ହେବାକୁ ଥିବା ସମରାଭ୍ୟାସରେ ଉଡାଣ ଭରିବ ଭାରତୀୟ ବାୟୁସେନାର ରାଫେଲ ବିମାନ । ଫ୍ରାନ୍ସର ଏହି ଅଭ୍ୟାସରେ ସାମିଲ ହେବା ପାଇଁ ବାୟୁସେନାର ଏକ କଣ୍ଟିନଜେଣ୍ଟ ଆସନ୍ତାକାଲି (ଶୁକ୍ରବାର) ଫ୍ରାନ୍ସ ଅଭିମୁଖେ ଉଡାଣ ଭରିବେ । ଫ୍ରାନ୍ସ ଏୟାର ଆଣ୍ଡ ଫୋର୍ସ (FASF)ର ମୋଣ୍ଟ ଦେ ମରସନରେ ଏହି ଅଭ୍ୟାସ ହେବାକୁ ଯାଉଛି । ଫ୍ରାନ୍ସରୁ ଆମଦାନୀ ହୋଇ ଭାରତୀୟ ବାୟୁସେନାରେ ସାମିଲ ହୋଇଥିବା ଅତ୍ୟାଧୁନିକ ଯୁଦ୍ଧ ବିମାନ ରାଫେଲ ଏହି ଅଭ୍ୟାସରେ ସାମିଲ ହେବା ପାଇଁ ଫ୍ରାନ୍ସ ଯାଉଛି । ତେବେ ବାୟୁସେନାରେ ନିୟୋଜିତ ହେବା ପରେ ଏହା ରାଫେଲର ପ୍ରଥମ ବିଦେଶରେ ଆୟୋଜିତ ଅଭ୍ୟାସରେ ଅଂଶଗ୍ରହଣ ।
ଫ୍ରାନ୍ସ ଯିବା ପାଇଁ ଚୟନ ହୋଇଥିବା ବାୟୁସେନାର କଣ୍ଟିନଜେଣ୍ଟରେ 4 ରାଫେଲ, ଦୁଇଟି ସି-17, ଦୁଇଟି ll-78 ଏୟାରକ୍ରାଫ୍ଟ ଅଂଶଗ୍ରହଣ କରିବେ । ଏହି ଅଭ୍ୟାସ ପାଇଁ ଭାରତୀୟ ବାୟୁସେନାର ସ୍ବତନ୍ତ୍ର ପ୍ରଶିକ୍ଷିତ 165 ବାୟୁଯୋଦ୍ଧାଙ୍କୁ ମଧ୍ୟ ଚୟନ କରାଯାଇଛି । ଏହି ଅଭ୍ୟାସ 17 ଏପ୍ରିଲରୁ ଆରମ୍ଭ ହୋଇ 5 ମେ’ରେ ଶେଷ ହେବାକୁ ସୂଚୀ ନିର୍ଦ୍ଧାରିତ ହୋଇଛି । ଭାରତୀୟ ବାୟୁସେନାର ଏହି କଣ୍ଟିନଜେଣ୍ଟ ଆସନ୍ତାକାଲି (ଶୁକ୍ରବାର) ଫ୍ରାନ୍ସ ଗସ୍ତ କରୁଛି । ବାୟୁସେନାରେ ସାମିଲ ହେବା ପରେ ରାଫେଲ ପ୍ରଥମ ଥର ପାଇଁ ବିଦେଶ ମାଟିରେ ଆୟୋଜିତ କୌଣସି ଯୁଦ୍ଧାଭ୍ୟାସରେ ଅଂଶଗ୍ରହଣ କରିବାକୁ ଯାଉଛି ।