ନୂଆଦିଲ୍ଲୀ: ପିଲିଭିତରୁ ବିଜେପି ସାଂସଦ ଥିବା ବରୁଣ ଗାନ୍ଧୀ (BJP MP Varun Gandhi)ବେଳେବେଳେ ନିଜ ବୟାନ ପାଇଁ କେନ୍ଦ୍ରରେ ଥିବା ନିଜ ଦଳ ନେତୃତ୍ବାଧୀନ ସରକାର ପାଇଁ ଅଡୁଆ ସୃଷ୍ଟି କରିବା ଘଟଣା କିଛି ନୂଆ ନୁହେଁ । ତେବେ ପୁଣି ଥରେ ବରୁଣ ସରକାରଙ୍କୁ ଘେରିଛନ୍ତି । ଏଥର ରୋଜଗାର ହାର ହ୍ରାସ ପାଇବା ପ୍ରସଙ୍ଗରେ ସେ ସରକାରଙ୍କୁ ସମାଲୋଚନା କରିଛନ୍ତି (Varun Gandhi on Employment )। ଟ୍ବିଟ କରି ବରୁଣ କହିଛନ୍ତି, ରୋଜଗାର ହାର ହ୍ରାସ ପାଇବାରେ ଲାଗିଛି, ଯାହା ଗତ 5 ବର୍ଷରେ ସର୍ବନିମ୍ନ । ଏପରି ସ୍ଥିତିରେ ରୋଜଗାର ପାଇଁ ଯୁବସମାଜକୁ କେତେ ଅପେକ୍ଷା କରିବାକୁ ପଡିବ ବୋଲି ସେ ପ୍ରଶ୍ନ ମଧ୍ୟ କରିଛନ୍ତି ।
ବରୁଣ କହିଛନ୍ତି, ‘‘ରୋଜଗାର 20.9% ରୁ ହାର ହ୍ରାସ ପାଇ 10.4% ରେ ପହଞ୍ଚିଲାଣି । ଯାହା ଗତ 5 ବର୍ଷ ମଧ୍ୟରେ ସର୍ବନିମ୍ନରେ ସ୍ତରରେ ପହଞ୍ଚିଛି । ନିକଟରେ ପ୍ରଧାନମନ୍ତ୍ରୀଜୀ ସମସ୍ତ ବିଭାଗରେ ଖାଲି ଥିବା ପ୍ରାୟ 10 ଲକ୍ଷ ପଦବୀ ପୂରଣ କରିବା ପାଇଁ ନିର୍ଦ୍ଦେଶ ମଧ୍ୟ ଦେଇଥିଲେ । କିନ୍ତୁ ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶ ପରେ ସୁଦ୍ଧା କୌଣସି ବିଭାଗ ସେ ଦିଗରେ ସଠିକ ପଦକ୍ଷେପ ଗ୍ରହଣ କରିବା ପାଇଁ ସକ୍ଷମ ହେଲେ ନାହିଁ । ଏପରି ସ୍ଥିତିରେ ଦେଶର ସଂଘର୍ଷଶୀଳ ଯୁବସମାଜ ଆଉ କେତେ ଅପେକ୍ଷା କରିବ । ’’
ସେ ଏକ ଡାଟାଚାର୍ଟ ମଧ୍ୟ ଟ୍ବିଟରେ ସଲଗ୍ନ କରିଛନ୍ତି (Varun Gandhi on Employment)। ଯେଉଁଥିରେ ରୋଜଗାର ଡାଟାର ଏକ ସୂଚାକାଙ୍କ ମଧ୍ୟ ରହିଛି । ଏଥିରେ ଯୁବକଙ୍କ ନିଯୁକ୍ତି ହାର ପୂର୍ବରୁ 20.9 ପ୍ରତିଶତ ଥିବା ବେଳେ ଏହା ଏବେ 10.4 ପ୍ରତିଶତକୁ ଖସିଛି । ଯାହା ଗତ 5 ବର୍ଷରେ ସର୍ବନିମ୍ନ ବୋଲି ଚାର୍ଟରେ ଦର୍ଶାଯାଇଛି । ପୂର୍ବରୁୁ ମଧ୍ୟ ବିଜେପି ସାଂସଦ ବରୁଣ ଏକାଧିକ ପ୍ରସଙ୍ଗରେ ନିଜ ଦଳ ବିଜେପି ନେତୃତ୍ବାଧୀନ ସରକାରଙ୍କୁ କଡା ସମାଲୋଚନା କରିଥିବାର ନଜିର ରହିଛି । ପୂର୍ବରୁ ସେ ଯୁବକଙ୍କ ରୋଜଗାର ଓ କୃଷକଙ୍କ ପାଇଁ ମଧ୍ୟ ସରକାରଙ୍କ ନୀତିକୁ ସମାଲୋଚନା କରି ଚର୍ଚ୍ଚାକୁ ଆସିସାରିଛନ୍ତି ।
ସୂଚନା ଅନୁସାରେ, ଗତ ଜୁନ ମାସରେ ଦେଶରେ ମୋଟ 10 ଲକ୍ଷ ପଦବୀରେ ଭର୍ତ୍ତି ପାଇଁ ଘୋଷଣା କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତେବେ ବିଭିନ୍ନ ବିଭାଗ ଏହି ଦିଗରେ ମିଶନ ମୋଡରେ କାର୍ଯ୍ୟକ୍ରମ ହାତକୁ ନେବା ଲାଗି ପ୍ରଧାନମନ୍ତ୍ରୀ ନିର୍ଦ୍ଦେଶ ମଧ୍ୟ ଦେଇଥିଲେ । ଏକାଧିକ ମନ୍ତ୍ରଣାଳୟ ଓ ସରକାରୀ ବିଭାଗରେ ଖାଲି ପଡିଥିବା ପଦବୀରେ ଭର୍ତ୍ତି ପ୍ରକ୍ରିୟା ଆରମ୍ଭ ହେବା ନେଇ ନିର୍ଦ୍ଦେଶ ମିଳି ସାରିଥିବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଥିଲା । ହେଲେ ପରବର୍ତ୍ତୀ ସମୟରେ ଏହି ଘୋଷଣା ଶିଥିଳ ପଡିଥିବା ବରୁଣ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
