ନୂଆଦିଲ୍ଲୀ:ସଂସଦରେ ସୁରକ୍ଷା ବିଭ୍ରାଟ ମାମଲାରେ ସୁରକ୍ଷା ଦାୟିତ୍ବରେ ଥିବା 8 ଜଣ ପୋଲିସ ଅଧିକାରୀଙ୍କୁ କାର୍ଯ୍ୟରେ ଅବହେଳା ଅଭିଯୋଗରେ ନିଲମ୍ବିତ କରାଯାଇଛି । ତେବେ ଏହି ଅଧିକାରୀମାନେ ଦିଲ୍ଲୀ ପୋଲିସ କିମ୍ବା କେନ୍ଦ୍ରୀ ଫୋର୍ସର ଯବାନ ତାହା ସ୍ପଷ୍ଟ ହୋଇନି । ହେଲେ ଏମାନେ ଭିଜିଟର ଓ ଗଣମାଧ୍ୟମ ପ୍ରତିନିଧିଙ୍କ ପାଇଁ ଉଦ୍ଦିଷ୍ଟ ପ୍ରବେଶ ପଥରେ ସୁରକ୍ଷା ଦାୟିତ୍ବରେ ନିୟୋଜିତ ଥିଲେ । ପୋଲିସ ବିଭାଗ କୌଣସି ସୂଚନା ଦେଇନଥିବା ବେଳେ ଗଣମାଧ୍ୟମ ସୂଚନା ଅନୁସାରେ, ଏହି ଅଧିକାରୀ ଓ ଯବାନଙ୍କ ନାମ ରାମପାଲ, ଅରବିନ୍ଦ, ବୀର ଦାସ, ଗଣେଷ, ଅନିଲ, ପ୍ରଦୀପ, ଭିମିତ ଓ ନରେନ୍ଦ୍ର ବୋଲି ଜଣାପଡିଛି । ଏମାନଙ୍କ ବିଭାଗ ସମ୍ପର୍କରେ ସ୍ପଷ୍ଟତା ଆସନି । ଏହା ସହିତ ଆଜି ଦିଲ୍ଲୀ ପୋଲିସ 7ଦିନିଆ ରିମାଣ୍ଡରେ 4 ଅଭିଯୁକ୍ତଙ୍କୁ ନେଇଛି । ଆଜି ଦିଲ୍ଲୀ ପୋଲିସ ପଟିଆଲା ହାଇସ କୋର୍ଟରେ 15 ଦିନିଆ ରିମାଣ୍ଡ ଆବେଦନ କରିଥିଲା ଦିଲ୍ଲୀ ପୋଲିସ ସ୍ପେଶାଲ ସେଲ ।
ଗତକାଲି ସଂସଦ ଆକ୍ରମଣର 22ତମ ବାର୍ଷିକୀ ଅବସରରେ ପୁଣି ଥରେ ଦେଶର ସର୍ବୋଚ୍ଚ ପଞ୍ଚାୟତର ସୁରକ୍ଷାରେ ବିଭ୍ରାଟ ଦେଖିବାକୁ ମିଳିଥିଲା । ଏବେ 4 ଅଭିଯୁକ୍ତ ଗିରଫ ହୋଇସାରିଥିବା ବେଳେ ମାଷ୍ଟର ମାଇଣ୍ଡଅଭିଯୁକ୍ତକୁ ପୋଲିସ ଖୋଜୁଛି । ଗୃହ ମଧ୍ୟରେ ପ୍ରବେଶ କରିଥିବା ଦୁଇ ଅଭିଯୁକ୍ତ ଯୁବକ ଭିଜିଟର ପାସରେ ପ୍ରବେଶ କରିଥିଲେ । ଏହି ପାସ ସେମାନଙ୍କୁ ମହୀଶୂରର ବିଜେପି ସାଂସଦ ପ୍ରତାପ ସିହ୍ନାଙ୍କ କାର୍ଯ୍ୟାଳୟରୁ ମିଳିଥିବା ବିରୋଧୀ ଅଭିଯୋଗ କରିଛନ୍ତି । ଅନ୍ୟପଟେ ଦୁଇ ଅନୁପ୍ରବେଶକାରୀଙ୍କ ମଧ୍ୟରେ ଜଣେ ମହୀଶୂରର ଯୁବକ ମଧ୍ୟ ରହିଛନ୍ତି ।