ଚଣ୍ଡିଗଡ:ଜର୍ମାନୀ ଗସ୍ତରେ ଥିବା ପଞ୍ଜାବ ମୁଖ୍ୟମନ୍ତ୍ରୀ ଭାଗଓ୍ବାନ୍ତ ମାନ ମଦ୍ୟପାନ କରିଥିବା କାରଣରୁ ଫ୍ରାଙ୍କଫର୍ଟରେ (Frankfurt) ବିମାନ ବନ୍ଦରରେ ତାଙ୍କୁ ବିମାନରୁ ଓହ୍ଲାଇ ଦିଆଯାଇଥବା ଅଭିଯୋଗ କରିଛନ୍ତି ବିରୋଧୀ (Drunk Bhagwant Mann Deplaned in germany)। ଏପରି ଅଭିଯୋଗ କରି ଟ୍ବିଟ କରିଛନ୍ତି ଅକାଳୀ ଦଳ ମୁଖ୍ୟ ସୁଖବୀର ସିଂ ବାଦଲ । ବାଦଲ ତାଙ୍କ ଅଭିଯୋଗରେ ଦାବି କରିଛନ୍ତି, ମୁଖ୍ୟମନ୍ତ୍ରୀ ଭାଗଓ୍ବନ୍ତ ମାନଙ୍କୁ ଜର୍ମାନର ଲୁଫଥାନ୍ସ ଏୟାରଲାଇନ୍ସର ଏକ ବିମାନରୁ ଓହ୍ଲାଇ ଦିଆଯାଇଥିଲା । ପଞ୍ଜାବ ବିରୋଧୀ ଦଳ ନେତା ପ୍ରତାପ ବାଜଓ୍ବା (PARTAP BAJWA pratap bajwa on Bhagwant Mann) ମଧ୍ୟ ସାମାନ ଅଭିଯୋଗ ସହ ପ୍ରେସମିଟ କରିଛନ୍ତି । ପ୍ରତାପ କହିଛନ୍ତି, ବିମାନକୁ ବୋର୍ଡିଂ କରିବା ସମୟରେ ମାନ ମଦ୍ୟପାନ କରିଥିବା କାରଣରୁ ସ୍ବାଭାବିକ ଅବସ୍ଥାରେ ନଥିଲେ । ସେ ନିଶାସକ୍ତ ଥିବା ଜଣାପଡିବା ପରେ ତାଙ୍କୁ ବିମାନରେ ଯାତ୍ରା କରିବା ପାଇଁ ବାରଣ କରାଯିବା ସହ ଓହ୍ଲାଇ ଦିଆଯାଇଥିଲା । ମାନଙ୍କ ଏପରି କାରନାମା ସାରା ବିଶ୍ବରେ ପଞ୍ଜାବବାସୀଙ୍କୁ ଲଜ୍ଜିତ କରିଛି । ତେଣୁ ମାନ ମୁଖ୍ୟମନ୍ତ୍ରୀ ପଦରୁ ତୁରନ୍ତ ଇସ୍ତଫା ଦିଅନ୍ତୁ ବୋଲି ସେ ଦାବି କରିଛନ୍ତି ।
ସୁଖବୀର ସିଂ ବାଦଲ ଆହୁରି ମଧ୍ୟ ଟ୍ବିଟରେ ଲେଖିଛନ୍ତି, ଆଶ୍ଚର୍ଯ୍ୟଜନକ କଥା ହେଉଛି ମୁଖ୍ୟମନ୍ତ୍ରୀଙ୍କ ଏପରି କାର୍ଯ୍ୟକଳାପ ସମ୍ପର୍କରେ ପଞ୍ଜାବ ସରକାର ନୀରବ ରହିଛନ୍ତି । ଏହି ପ୍ରସଙ୍ଗରେ ଆପ ମୁଖ୍ୟ ଅରବିନ୍ଦ କେଜ୍ରିୱାଲ ସ୍ପଷ୍ଟୀକରଣ ଦେବା ଉଚିତ୍ । ପଞ୍ଜାବୀ ଏବଂ ଦେଶର ମର୍ଯ୍ୟାଦା ହାନୀ ହୋଇଥିବା କାରଣରୁ ଭାରତ ସରକାର ମଧ୍ୟ ମାନଙ୍କ ବିରୋଧରେ ପଦକ୍ଷେପ ନେବା ଉଚିତ୍ । ଯଦି ତାଙ୍କୁ ବିମାନରୁ ବାହାର କରାଯାଇଥିଲା, ତେବେ ଭାରତ ସରକାର ଜର୍ମାନ ପ୍ରତିପକ୍ଷଙ୍କ ସହ ଏହି ପ୍ରସଙ୍ଗ ଉଠାଇବା ଉଚିତ୍ । ଅନ୍ୟପକ୍ଷେ ବ୍ରିକମ ସିଂ ମନଜିତିଆ ମଧ୍ୟ ଏହି ପ୍ରସଙ୍ଗରେ ଭଗବନ୍ତ ମାନଙ୍କୁ କଡା ସମାଲୋଚନା କରିଛନ୍ତି ।