ମୁମ୍ବାଇ:ପାକିସ୍ତାନୀ ମହିଳାଙ୍କ ଦ୍ବାରା ହନିଟ୍ରାପର ଶିକାର ହୋଇ ଗିରଫ ହୋଇଥିବା ଡିଆରଡିଓ ବୈଜ୍ଞାନିକ ପ୍ରଦୀପ କୁରୁଲକରଙ୍କୁ ନେଇ ଆଚମ୍ବିତ କରିବା ପରି ତଥ୍ୟ ଧୀରେଧୀରେ ସାମ୍ନାକୁ ଆସିବାରେ ଲାଗିଛି । ନିକଟରେ ସେ ଉକ୍ତ ପାକିସ୍ତାନୀ ମହିଳାଙ୍କୁ ଭାରତୀୟ କ୍ଷେପଣାସ୍ତ୍ର ପ୍ରଣାଳୀ ‘ବ୍ରହ୍ମୋସ’ ଓ ‘ଅଗ୍ନି’ର ବହୁ ଗୁରୁତ୍ବପୂର୍ଣ୍ଣ ତଥ୍ୟ ଦେଇଥିବା ଜଣାପଡିଥିଲା । ଏବେ ସେ ମହିଳାଙ୍କ ସହ ସିଧାସଳଖ ସାକ୍ଷାତ କରିଥିବା ତଥ୍ୟ ମଧ୍ୟ ସାମ୍ନାକୁ ଆସିଛି । ସେ ସମ୍ପୃକ୍ତ ମହିଳାଙ୍କ ସହ ବିଦେଶରେ କ୍ରିକେଟ୍ ମ୍ୟାଚ ଦେଖିଛନ୍ତି ଓ ବାର୍ ଯାଇ ସମୟ କାଟିଥିବା ତଦନ୍ତର ଘଟଣାକ୍ରମରୁ ଜଣାପଡିଛି ।
ଘଟଣାର ତଦନ୍ତ ମୁମ୍ବାଇ ଏଟିଏସ ଜାରି ରଖିଛି । ମାମଲାରେ ଅଧିକ ଜେରା ପାଇଁ ଗିରଫ ବୈଜ୍ଞାନିକ ପ୍ରଦୀପଙ୍କୁ 15 ତାରିଖ ଯାଏଁ ରିମାଣ୍ଡରେ ନେଇଛି ତଦନ୍ତକାରୀ ସଂସ୍ଥା । ତାଙ୍କୁ ଜେରା ବେଳେ ଏହି ତଥ୍ୟ ସାମ୍ନାକୁ ଆସିଛି । ସେ 6 ଦେଶ ପରିଭ୍ରମଣ କରିଛନ୍ତି । ଏହି ଗସ୍ତ ମଧ୍ୟରେ ସେ କୌଣସି ଏକ ଦେଶରେ ଏହି ପାକିସ୍ତାନୀ ମହିଳାଙ୍କ ସହ ପ୍ରତ୍ୟେକ୍ଷ ସାକ୍ଷାତ କରିବା ସହ ତାଙ୍କ ଭାରତ-ପାକିସ୍ତାନ କ୍ରିକେଟ ମ୍ୟାଚ୍ ମଧ୍ୟ ଦେଖିଛନ୍ତି । ଉଭୟ କ୍ରିକେଟ ମ୍ୟାଚ ଦେଖିବା ପରେ କୌଣସି ଏକ ହୋଟେଲ କିମ୍ବା ବାରରେ ମଧ୍ୟ ସମୟ କାଟିଥିବା ତାଙ୍କ ଫୋନ ଓ ଇ-ମେଲରୁ ଜଣାପଡିଛି । ତେବେ ଉଭୟଙ୍କ ମଧ୍ୟରେ କେବେ, କେଉଁ ଦେଶରେ ଏହି ସାକ୍ଷାତକାର ଓ କ୍ରେକେଟ୍ ମ୍ୟାଚ ଦେଖିବା ହୋଇଛି, ସେନେଇ ଏଟିଏସ୍ କିଛି ସୂଚନା ଦେଇନି ।