ଜାନୁୟାରୀ ୨୬ରୁ ଭକ୍ତଙ୍କ ପାଇଁ ଖୋଲିବ ଅଯୋଧ୍ୟା ରାମ ମନ୍ଦିର

ଜାନୁୟାରୀ ୨୬ରୁ ଶ୍ରଦ୍ଧାଳୁଙ୍କ ପାଇଁ ଖୋଲିବ ଅଯୋଧ୍ୟା ରାମ ମନ୍ଦିର । ସାରା ଦେଶରୁ ଶ୍ରଦ୍ଧାଳୁମାନେ ଆସି ପ୍ରଭୁ ରାମଲାଲାଙ୍କ ଦର୍ଶନ ଓ ପୂଜାର୍ଚ୍ଚନା କରିପାରିବେ । ଅଧିକ ପଢ଼ନ୍ତୁ

ଅଯୋଧ୍ୟା:ରାମ ଭକ୍ତଙ୍କ ପାଇଁ ଖୁସି ଖବର । ଜାନୁୟାରୀ ୨୬ରୁ ଭକ୍ତଙ୍କ ପାଇଁ ଖୋଲିବ ଅଯୋଧ୍ୟା ରାମ ମନ୍ଦିର । ଆସନ୍ତା ଜାନୁୟାରୀ ୨୨ ତାରିଖରେ ଆଯୋଧ୍ୟାରେ ପ୍ରଭୁ ରାମଲାଲାଙ୍କ ମନ୍ଦିରର ଉଦଘାଟନ ହେବ । ଏଥିପାଇଁ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ସାଧୁସନ୍ଥମାନଙ୍କୁ ଆମନ୍ତ୍ରିତ କରିସାରିଛି । ମନ୍ଦିରର ଉଦଘାଟନ ପରେ ୨୬ ଜାନୁଆରୀରୁ ପ୍ରଭୁ ଶ୍ରୀରାମଚନ୍ଦ୍ରଙ୍କ ଦର୍ଶନ କରିପାରିବେ ଶ୍ରଦ୍ଧାଳୁ । ଏନେଇ ଟ୍ରଷ୍ଟ ପକ୍ଷରୁ ଦେଶବ୍ୟାପୀ ଶ୍ରଦ୍ଧାଳୁମାନଙ୍କୁ ନିୟନ୍ତ୍ରିତ କରାଯାଇଛି । ଟ୍ରଷ୍ଟର ମହାସଚିବ ଚମ୍ପତ ରାଏ ଜାନୁଆରୀ ୨୬ରୁ ପୁରୁଷୋତ୍ତମ ପ୍ରଭୁ ଶ୍ରୀରାମଙ୍କ ମନ୍ଦିରକୁ ଆସି ଦର୍ଶନ ଓ ପୂଜାର୍ଚ୍ଚନା କରିବା ପାଇଁ ଦେଶବାସୀଙ୍କୁ ଆହ୍ବାନ କରିଛନ୍ତି ।

ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ମହାସଚିବ ଭଗବାନ ଶ୍ରୀରାମଙ୍କ ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମରେ କୌଣସି ମାନଗଣ୍ୟ ବ୍ୟକ୍ତି ଅଯୋଧ୍ୟା ନଆସିବାକୁ ନିବେଦନ କରିଛନ୍ତି । କାରଣ ପ୍ରାଣ ପ୍ରତିଷ୍ଠା ସମାରୋହରେ ଟ୍ରଷ୍ଟ ପଦାଧିକାରୀଙ୍କ ସମେତ ଜିଲ୍ଲାର ପ୍ରଶାସନିକ ଅଧିକାରୀମାନେ ଖୁବ୍ ବ୍ୟସ୍ତ ରହିବେ । ସେଥିପାଇଁ ବିଶିଷ୍ଟ ବ୍ୟକ୍ତିବିଶେଷମାନଙ୍କୁ ଉଚିତ୍ ସମ୍ମାନ ଓ ସୁରକ୍ଷା ମିଳିନପାରେ । ତେଣୁ କେବଳ ଯେଉଁ ଅତିଥିମାନଙ୍କୁ ଆମନ୍ତ୍ରିତ କରାଯିବ କେବଳ ସେହିମାନେ ହିଁ ଜାନୁଆରୀ ୨୨ କାର୍ଯ୍ୟକ୍ରମରେ ସାମିଲ ହେବାକୁ ଅନୁରୋଧ କରାଯାଇଛି ।

ଚମ୍ପତ ରାୟ କହିଛନ୍ତି ଯେ, ରାମ ମନ୍ଦିରର ଉଦଘାଟନ ପରେ ଜାନୁୟାରୀ ୨୬ରୁ କେବଳ ଦେଶ ନୁହେଁ, ସମଗ୍ର ବିଶ୍ବରୁ ରାମ ଭକ୍ତମାନେ ଅଯୋଧ୍ୟା ଆସି ପ୍ରଭୁ ପୁରୁଷୋତ୍ତମ ରାମଚନ୍ଦ୍ରଙ୍କ ଦର୍ଶନ ଓ ପୂଜାର୍ଚ୍ଚନା କରିପାରିବେ । ସେମାନେ ନିଜ ନିଜ ହିସାବରେ ତିଥି ସ୍ଥିର କରନ୍ତୁ । ଆମେରିକା ଲୋକ କେବେ ଆସିବେ, ବ୍ରିଟେନ ଓ କାନାଡ଼ା ଲୋକ କେବେ ଆସିବେ ତାହା ସେମାନଙ୍କ ଇଚ୍ଛା ଉପରେ ନିର୍ଭର କରେ ।

ପାଣିପାଗକୁ ଦୃଷ୍ଟିରେ ରଖି ବିଭିନ୍ନ ରାଜ୍ୟର ଶ୍ରଦ୍ଧାଳୁଙ୍କୁ ଆମନ୍ତ୍ରିତ କରିବା ପାଇଁ ଆମେ ବ୍ୟବସ୍ଥା କରିଛୁ । ଯେମିତିକି, ଶୀତ ସମୟରେ ଦକ୍ଷିଣ ଭାରତୀୟଙ୍କୁ ଅଯୋଧ୍ୟା ଆସିବାରେ ସୁବିଧା ହେବ । ସେଥିପାଇଁ ଏକ କମିଟି ଗଠନ କରାଯାଇ ଟେଲିଫୋନ ଜରିଆରେ ଅଲଗା ଅଲଗା ରାଜ୍ୟର ଲୋକଙ୍କୁ ଭିନ୍ନ ଭିନ୍ନ ସମୟରେ ଆଯୋଧ୍ୟା ଆସିବାକୁ ଆମନ୍ତ୍ରିତ କରିବୁ । ଏଠାରେ ସେମାନଙ୍କର ରହଣୀ ଏବଂ ଖାଦ୍ୟପାନୀୟର ସମସ୍ତ ବ୍ୟବସ୍ଥା କରାଯିବ । ପ୍ରଭୁ ରାମଲାଲଙ୍କ ଦର୍ଶନ ପାଇଁ ଆମେ ସମଗ୍ର ବିଶ୍ବକୁ ନିମନ୍ତ୍ରିତ କରୁଛୁ ବୋଲି ଟ୍ରଷ୍ଟର ମହାସଚିବ କହିଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ