ହାଇଦ୍ରାବାଦ:ନୂଆଦିଲ୍ଲୀ ନଗର ନିଗମ ନିର୍ବାଚନ (Delhi mcd polls)ରେ କେଜ୍ରିଓ୍ବାଲଙ୍କ ନେତୃତ୍ବାଧୀନ ଆମ ଆଦମୀ ପାର୍ଟି (AAP)ବହୁମତ ହାସଲ କରିଛି । ତେବେ ଏହି ଫଳାଫଳ ସହ ଦିଲ୍ଲୀ ମହାନଗରରେ ଗତ 15ବର୍ଷ ଧରି କ୍ଷମତାରେ ଥିବା ଭାରତୀୟ ଜନତା ପାର୍ଟିର କ୍ଷମତା ଯୁଗ ମଧ୍ୟ ଶେଷ ହୋଇଛି । ଫଳାଫଳ ପରେ ଆପ (AAP)କର୍ମୀମାନେ ଉତ୍ସବ ପାଳନ କରିବା ଆରମ୍ଭ କରିସାରିଛନ୍ତି । ଜନମତ ପାଇଁ ଦିଲ୍ଲୀବାସୀଙ୍କୁ ଧନ୍ୟବାଦ ଦେଇଛନ୍ତି ମୁଖ୍ୟମନ୍ତ୍ରୀ ତଥା ଦଳର ପ୍ରତିଷ୍ଠାତା ଅରବିନ୍ଦ କେଜ୍ରିଓ୍ବାଲ । ସେହିପରି କେଜ୍ରିଓ୍ବାଲ କହିଛନ୍ତି, "ଏହି ଫଳାଫଲ ମାଧ୍ୟମରେ ଦିଲ୍ଲୀବାସୀ ସାରା ଦେଶକୁ ଏକ ବାର୍ତ୍ତା ଦେଇଛନ୍ତି । ଆମେ ବିଜେପି ଓ କଂଗ୍ରେସ ସହ ସହଭାଗିତାରେ ଦିଲ୍ଲୀର ଉନ୍ନତି ପାଇଁ କାର୍ଯ୍ୟ କରିବୁ । ଆମକୁ ଦିଲ୍ଲୀକୁ ଦୁର୍ନୀତି ମୁକ୍ତ କରିବାକୁ ହେବ ।"
ନିର୍ବାଚନ କମିଶନଙ୍କ ସଦ୍ୟତମ ସୂଚନା ଅନୁସାରେ, ମୋଟ 250 ଆସନରୁ ଆମ ଆଦମୀ ପାର୍ଟି 126 ଆସନରେ ବିଜୟୀ ହୋଇସାରିଛି । 2007ରୁ ମହାନଗର ନିଗମରେ କ୍ଷମତାରେ ଥିବା ଭାରତୀୟ ଜନତା ପାର୍ଟି ମାତ୍ର 97 ଆସନରେ ବିଜୟୀ ହୋଇଛି । ସେହିିପରି ସ୍ୱାଧୀନ ପ୍ରାର୍ଥୀ ଅନ୍ୟ 6ଟି ଆସନରେ ଆଗୁଆ ରହିଛନ୍ତି । ଏହାରି ମଧ୍ୟରେ ଆମ ଆଦମୀ ପାର୍ଟି ଅଧାରୁ ଅଧିକ ଆସନ ଦଖଲ କରିସାରିଛି । ଭାରତୀୟ ଜନତା ପାର୍ଟି ଦୀର୍ଘ 15ବର୍ଷ ପରେ ପରାଜୟର ସ୍ବାଦ ଚାଖିଛି । ଆଜି ସକାଳ 8ଟାରୁ ଭୋଟ ଗଣତି ହୋଇଥିଲା । ଏବେ ମଧ୍ୟ ଗଣତି ଜାରି ରହିଥିବା ବେଳେ ବହୁମତ ନେଇ ସଂଖ୍ୟା ସ୍ପଷ୍ଟ ହୋଇସାରିଛି ।