ନୂଆଦିଲ୍ଲୀ:ଶୀତ ଋତୁ ଆରମ୍ଭ ପୂର୍ବରୁ ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ସଙ୍କଟଜନକ ସ୍ତରରେ ପହଞ୍ଚିଛି । ଏହାର ମୁକାବିଲା କରିବା ପାଇଁ ଆଜି ଏକ ବଡ ପଦକ୍ଷେପ ଗ୍ରହଣ କରିଛନ୍ତି ଦିଲ୍ଲୀ ସରକାର । ଦିଲ୍ଲୀ ଓ ଏନସିଆରରେ ଆଜିଠାରୁ ଡିଜେଲ ଚାଳିତ ବସ ସେବାକୁ ନିଷେଧ କରାଯାଇଛି । ଏବେ କେବଳ ଇଲେକ୍ଟ୍ରିକ, ସିଏନଜି ଓ ବିଏସ-6 ବର୍ଗର ବସକୁ ରାଜଧାନୀରେ ଯାତାୟତ କରିବାକୁ ଅନୁମତି ପ୍ରଦାନ କରାଯାଇଛି । ତେଣୁ ସମସ୍ତେ ଏଥିରେ ସହଯୋଗ କରିବାକୁ ଅନୁରୋଧ କରିଛନ୍ତି ଦିଲ୍ଲୀ ପରିବେଶ ମନ୍ତ୍ରୀ ଗୋପାଲ ରାୟ ।
ଗଣମାଧ୍ୟମକୁ ସୂଚନା ଦେଇ ପରିବେଶ ମନ୍ତ୍ରୀ ଗୋପାଲ ରାୟ କହିଛନ୍ତି, ବାୟୁ ଗୁଣବତ୍ତା ପରିଚାଳନା ଆୟୋଗ (CAQM)ର ବର୍ତ୍ତମାନର ସ୍ଥିତି ସମୀକ୍ଷା ଓ ପରାମର୍ଶ ଅନୁସାରେ ଏହି ନିଷ୍ପତ୍ତି ଗ୍ରହଣ କରାଯାଇଛି । ଏବେ ଦିଲ୍ଲୀ ଓ ଏନସିଆରରେ ଡିଜେଲ ବସକୁ ଆଜିଠାରୁ ବନ୍ଦ କରାଯାଇଛି । ସରକାରୀ ପରିବହନ ସଂସ୍ଥା ମଧ୍ୟ ଏହାକୁ ଅନୁପାଳନ କରିବ । ନିଜ ବସ ଡିପୋରୁ କେବଳ ଇଲେକ୍ଟ୍ରିକ, ସିଏନଜି ଓ ବିଏସ-6 ବର୍ଗର ବସକୁ ସେବାରେ ନିୟୋଜିତ କରିବା ଉଚିତ । ଯାହା ଫଳରେ ଲୋକେ ସମସ୍ୟାର ସାମ୍ନା କରିବେ ନାହିଁ । ସେହିପରି ସ୍ଥିତିକୁ ଦେଖି ମୋଟ 18ଟି ଟିମ ମଧ୍ୟ ଗଠନ କରାଯାଇଛି । ଏହି ଟିମ୍ ଏହି ନିୟମ ପାଳନ ପ୍ରକ୍ରିୟାକୁ ସୁନିଶ୍ଚିତ କରିବା ସହ ବାୟୁ ପ୍ରଦୂଷଣର ମୁକାବିଲା ଦିଗରେ କାର୍ଯ୍ୟ କରିବ ।
ଟ୍ରାଫିକ୍ ବହୁଳ ଦିଲ୍ଲୀରେ ପ୍ରାୟ ପ୍ରତ୍ୟେକ ବର୍ଷ ଶୀତଦିନେ ଏହି ସମସ୍ୟା ଦେଖାଯାଏ । ପଡୋଶୀ ହରିୟାଣା, ପଞ୍ଜାବ, ଉତ୍ତର ପ୍ରଦେଶ ଓ ରାଜସ୍ଥାନରୁ ହଜାର ହଜାର ଯାତ୍ରୀବାହୀ ବସ ଦିଲ୍ଲୀକୁ ପ୍ରତ୍ୟେହ ଯାତାୟତ କରିଥାନ୍ତି । ଏହା ମଧ୍ୟରେ ଅନେକ ବସ ପୁରୁଣା ଡିଜେଲ ଶ୍ରେଣୀର ରହିଛନ୍ତି । ଏହି ବର୍ଗରେ ବିଏସ-3 ଓ 4 ବର୍ଗର ଇଞ୍ଜିନ ଚାଳିତ ବସ ରହିଛି । ତେଣୁ ଯାନବାହନରୁ ନିର୍ଗତ ହେଉଥିବା ଧୂଆଁ ହିଁ ରାଜଧାନୀ ବାୟୁ ପ୍ରଦୂଷଣର ପ୍ରମୁଖ କାରଣ ଭାବେ ସାମ୍ନାକୁ ଆସିଛି ।