ନୂଆଦିଲ୍ଲୀ: କୋଭିଡ ମହାମାରୀ କେବଳ ବିଶ୍ବବାସୀଙ୍କ ପ୍ରାଣହାନୀ କରି ଆତଙ୍କ ସୃଷ୍ଟି କରିଛି ତାହା ନୁହେଁ, ବିଶ୍ବ ଅର୍ଥନୀତିରେ ମଧ୍ୟ ଗଭୀର ପ୍ରଭାବ ପକାଇଛି । କୋଭିଡ ସମୟରେ ଅର୍ଥନୀତି ପ୍ରଭାବିତ ହେବାକୁ ନେଇ ଉଦବେଗଜନକ ତଥ୍ୟ ଆଣିଛି ବିଶ୍ବ ସ୍ବାସ୍ଥ୍ୟ ସଂଗଠନ ଓ ବିଶ୍ବ ବ୍ୟାଙ୍କ । ବିଶ୍ବ ଅର୍ଥନୀତିର ପ୍ରାୟ 2ଦଶନ୍ଧିର ବିକାଶର ହାରକୁ ପ୍ରଭାବିତ କରିଛି କୋଭିଡ ମହାମାରୀ।
ଏହି ପରିସଂଖ୍ୟାନକୁ ହିସାବକୁ ନେଲେ ସମଗ୍ର ବିଶ୍ବରେ ପ୍ରାୟ ଅଧା ବିଲିୟନ ଲୋକସଂଖ୍ୟା ତଥା ପ୍ରାୟ 50 କୋଟି ଲୋକ ପୁଣି ଥରେ ଦାରିଦ୍ର ସୀମାରେଖା ତଳକୁ ଖସିଛନ୍ତି । ରିପୋର୍ଟରେ କୁହାଯାଇଛି ଯେ, ସାରା ବିଶ୍ବର କୋଭିଡ ଆକ୍ରାନ୍ତଙ୍କ ସଂଖ୍ୟା ବଢିବା ସହ ସ୍ବାସ୍ଥ୍ୟସେବା ଭିତ୍ତିଭୂମି ସୁଦୃଢିକରଣ ଖର୍ଚ୍ଚ ମଧ୍ୟ ବୃଦ୍ଧି ପାଇଛି । ଫଳରେ ଅନ୍ୟାନ୍ୟ ଭିତ୍ତିଭୂମି ସମ୍ପର୍କିତ କାର୍ଯ୍ୟ ପ୍ରଭାବିତ ହୋଇଛି । ସ୍ବାସ୍ଥ୍ୟସେବା ସମ୍ପର୍କିତ ଖର୍ଚ୍ଚ ପାଇଁ ବ୍ୟକ୍ତିଗତ ଆୟର ପ୍ରାୟ 10 ପ୍ରତିଶତ ବା ପରିବାରର ହାଉସହୋଲ୍ଡ ବଜେଟର ପ୍ରାୟ 10 ପ୍ରତିଶତ ଖର୍ଚ୍ଚ କରିବା ପାଇଁ ଲୋକେ ବାଧ୍ୟ ହୋଇଛନ୍ତି ।