ହାଇଦ୍ରାବାଦ:ସାରା ଦେଶରେ କୋରୋନା ହଇଚଇ ସୃଷ୍ଟି କରିଛି । କୋରୋନା ମହାମାରୀ କବଳରୁ ବର୍ତ୍ତମାନ ସଚେତନତା ହିଁ ଲୋକଙ୍କୁ ରକ୍ଷା କରି ପାରିବ । ମହାମାରୀ ନେଇ ଲୋକଙ୍କୁ ସଚେତନ କରିବା ସହିତ ଲକଡାଉନର ଗୁରୁତ୍ବ ବିଷୟରେ ଲୋକଙ୍କୁ ଅବଗତ କରାଇବା ପାଇଁ ରାସ୍ତାରେ ଚିତ୍ର ଆଙ୍କି ସଚେତନତାର ବାର୍ତ୍ତା ଦେଇଛନ୍ତି ରାଜନ କୁମାର ନାମକ ଜଣେ ଚିତ୍ରକର । ପୋଲିସ ସହାୟତା ହାଇଦ୍ରାବାଦର ଖାଇରତାବାଦ ରାସ୍ତାରେ ଚିତ୍ର ଅଙ୍କାଯାଇଛି ।
କୋରୋନାର ଚିତ୍ର ଆଙ୍କିବା ସହିତ ସେଥିରେ ଲୋକଙ୍କୁ କୋରୋନା ଚେତାବନୀ ଦେଲା ଭଳି କଥା ଲେଖିଛନ୍ତି । ସେଥିରେ ଲେଖିଛନ୍ତି ଯେ ସମସ୍ତେ'ଘରେ ରୁହ' ନଚେତ କୋରୋନା ତୁମ ଘରେ ପହଞ୍ଚିଯିବ । ଗତ 33ବର୍ଷ ଧରି ରାଜନ କୁମାର ଚିତ୍ରକର ଭାବରେ କାର୍ଯ୍ୟ କରି ଆସୁଛନ୍ତି । କୋରୋନାର ପ୍ରଥମ ଲହରରେ ଜୁବଲୀ ହିଲ ଚେକ ପୋଷ୍ଟରେ ଏହି ପରି ଚିତ୍ର ମାଧ୍ୟମରେ ଲୋକଙ୍କୁ ସଚେତନ କରିବାକୁ ଯୋଜନା କରିଥିବା କହିଛନ୍ତି ରାଜନ । ମାତ୍ର ତାଙ୍କୁ ଅନୁମତି ମିଳିନଥିଲା । ମାତ୍ର ଚଳିତ ବର୍ଷ ହାଇଦ୍ରାବାଦ ପୋଲିସ ସହାୟତାରେ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିପାରିଛୁ ବୋଲି କହିଛନ୍ତି ରାଜନ ।